Pra heta paviedamiŭ u svaim fejsbuku historyk Andrej Vaškievič.
«Sumnaja viestka — pamior Aleś Biełakoz. Addany patryjot Biełarusi, čałaviek vialikaha serca, stvaralnik Hudzievickaha muzieja, adzinaha na Hrodzienščynie školnaha muzieja, jakomu ŭdałosia stać dziaržaŭnym. Pamiatajem hetaha čałavieka. Śvietłaja pamiać!» — napisaŭ jon.
Aleś Biełakoz naradziŭsia 11 listapada 1928 h. u Latkach (siońnia Mastoŭski rajon) u siamji małaziamielnaha sielanina, jaki pa viartańni z zarobkaŭ u Brazilii pabudavaŭ na zaroblenyja hrošy dom u vioscy Latki i adčyniŭ pryvatnuju kramu.
Amal usio žyćcio Aleś Biełakoz pražyŭ u svajoj vioscy, jakaja ź ciaham času źliłasia z bujniejšymi Hudzievičami.
Paśla niaŭdałaj sproby pastupić u Minski miedycynski instytut admoviŭsia ad karjery doktara i ŭładkavaŭsia nastaŭnikam druhich i čaćviortych kłasach u Hudzievickaj škole. Z 1958 h. — vykładčyk biełaruskaj movy i litaratury ŭ Hudzievickaj siaredniaj škole
U 1965 jon naładžvaje pierapisku vučniaŭ ź viadomymi biełaruskimi piśmieńnikami, arhanizoŭvaje školny kabiniet biełaruskaj litaratury, jaki ź ciaham času pieratvaryŭsia ŭ muziej.
Vučni zachapilisia litaraturnaj i daślednickaj dziejnaściu, ich pracy pačali drukavacca ŭ biełaruskich hazietach i časopisach.
U 1966 Biełakoz razam z vučniami vydaŭ pieršy numar mašynapisnaha litaraturna-krajaznaŭčaha almanachu «Pramieńčyk». Vydańnie vychodziła raz na dva hady. Usiaho da kanca 1980-ch vyjšła 14 numaroŭ, pa 4 asobniki kožny.
Praz svaju pryncypovuju biełaruskuju pazicyju nastaŭnik ad 1960-ch mieŭ sutyknieńni z uładami i KDB.
«Biełorusskij jazyk dołžien isčieznuť, a vy nam miešajetie. Iźmieniajtie svojo otnošienije k etomu jazyku, propahandirujtie russkij», — kazali kadebisty Biełakozu ŭ 1969-m.
Z 1990 Hudzievicki litaraturna-etnahrafičny muziej, zasnavany Biełakozam, nabyŭ status dziaržaŭnaha i naličvaje bolš za 12 tysiač ekspanataŭ, sabranych razam z vučniami.
Navat paśla vychadu na piensiju Aleś Biełakoz vadziŭ u muziej ekskursii, bo nichto nie zdolny byŭ heta rabić tak zachaplalna i emacyjna.
Aleś Biełakoz niekalki dziesiacihodździaŭ zmahaŭsia z ankałohijaj.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary