Školnica adkaznaści nie paniasie. Padrabiaznaści seks-skandału z čynoŭnikam i VIČ-infiekcyjaj

Školnica z Babrujskaha rajona, u jakoj vyjaŭlena VIČ-infiekcyja, nie paniasie adkaznaści za jaje raspaŭsiud. Pra toje, što 14-hadovy padletak źjaŭlajecca nośbitam VIČ, stała viadoma paśla taho, jak jana daviedałasia pra ciažarnaść, a jaje maci nastajała na aborcie. Školnica skazała, što ŭ jaje była suviaź sa staršynioj sielsavieta. Razhareŭsia skandał.

Namieśnik prakurora Babrujska Hienadź Jarmak, nie zakranajučy kankretnaha vypadku, rastłumačyŭ, što artykuł 157 Kryminalnaha kodeksa «Zaražeńnie virusam imunadeficytu čałavieka» praduhledžvaje roznyja miery pakarańnia — ad štrafu da pazbaŭleńnia voli na termin ad 2-ch da 13 hadoŭ, u zaležnaści ad ciažaru ździejśnienaha złačynstva.

— A voś niepaŭnaletniaja asoba za raspaŭsiudžvańnie VIČ-infiekcyi nie moža być pakarana pa hetym artykule, bo kryminalnaj adkaznaści padlahaje toj, chto na momant ździajśnieńnia dasiahnuŭ 16-hadovaha ŭzrostu, — paviedamiŭ Hienadź Siarhiejevič. — Kryminalnaja adkaznaść praduhledžana tolki dla tych niepaŭnaletnich, jakija ździejśnili asabliva ciažkija złačynstvy: naprykład, zabojstva, rabavańnie, zhvałtavańnie i h.d.

Čynoŭnika zatrymali 21 listapada. Jamu pradjavili abvinavačańnie za pałavyja znosiny i inšyja dziejańni seksualnaha charaktaru z asobaj, jakaja nie dasiahnuła šasnaccacihadovaha ŭzrostu.

Vyśvietliłasia, što užo 16 listapada zatrymany, jaki sumiaščaŭ dźvie pasady — staršyni sielsavieta i kiraŭnika sielskaha vykankama, — napisaŭ zajavu na zvalnieńnie pa ŭłasnym žadańni. Paźniej, pa słovach jaho kalehaŭ, rašeńniem siesii rajsavieta jaho pazbavili deputackaha mandata.

Miascovyja žychary pierakananyja: ich staršynia, a ŭ minułym — školny nastaŭnik, prosta nie moh spakusić niepaŭletniuju. Kalehi zatrymanaha mužčyny pieražyvajuć za jaho i spačuvajuć jaho žoncy, 56-hadovaj byłoj nastaŭnicy.

38-hadovaja maci 14-hadovaj dziaŭčynki adna vychoŭvaje dvaich dziaciej i pryznajecca, što małodšaja dačka z 12 hadoŭ adbiłasia ad ruk. Pavodle jaje słoŭ, viasnoj školnica pačała skardzicca na boli ŭ žyvacie, adpraviłasia da doktara i paviedamiła, što ciažarnaja. Maci nastajała na aborcie. Analizy, jakija zdała jaje dačka pierad štučnym pieraryvańniem ciažarnaści, pakazali: dziaŭčynka źjaŭlajecca nośbitam VIČ-infiekcyi.

Pačali vyśviatlać, z kim u padletka była suviaź. Jana nazvała imiony niekalkich chłopcaŭ i staršyni sielsavieta. Pry hetym maci kaža, što chłopcy, ź jakimi sustrakałasia jaje dačka, taksama zdali analizy na VIČ-infiekcyju, i jany byli admoŭnymi.

• 0
• 0
• 0
• 0
• 0
• 0
• 0
• 0