Chto taki hramadzianin Rasii Andrej Sałanhin, jakoha departavali ź Biełarusi?
2 śniežnia ź Biełarusi byŭ vysłany dyrektar futbolnaha kłuba «Tarpieda», hramadzianin Rasii Andrej Sałanhin. U toj samy dzień jaho vyklikali ŭ Adździeł pa hramadzianstvu i mihracyi Pieršamajskaha RUUS Minska, dzie pastavili štamp ab departacyi. I choć spadar Sałanhin musiŭ pakinuć našu krainu da 6 śniežnia, u toj ža samy dzień jaho pasadzili na ciahnik da Maskvy. Termin zabarony na ŭjezd na terytoryju našaj krainy składaje piać hadoŭ. Pryčyny takoha rašeńnia patłumačanyja nie byli.
Chto ž taki hety Andrej Sałanhin? I čamu jon pryciahnuŭ uvahu biełaruskich siłavikoŭ? Sałanhinu 31 hod, u Biełarusi jon žyvie ad siaredziny 90-ych. Jahonyja žonka i dzieci — hramadzianie Biełarusi.
Ad kanca 90-ch Sałanhin staŭ aktyŭnym fanatam minskaha «Tarpieda». U toj čas kamanda jašče vystupała ŭ vyšejšaj lizie čempijanatu Biełarusi, była druhoj pa papularnaści ŭ Minsku.
«Paśla razvału kłuba ŭ 2005-m [ad kamandy admoviŭsia sponsar i jana stała isnavać na achviaravańni zaŭziataraŭ — «NN»], padtrymlivaŭ kamandu materyjalna, kali jana vystupała ŭ čaćviortym dyvizijonie, u 2014-m staŭ hałoŭnym inicyjataram viartańnia kłubu prafiesijnaha statusu i rehistracyi spartovaha tavarystva «Tarpieda», jakim i kiravaŭ. U 2016-m sa spartovaha tavarystva adradziŭsia ŭžo Prafiesijny futbolny kłub «Tarpieda», dzie Sałanhin spačatku byŭ namieśnikam dyrektara pa sporcie, a 15 červienia staŭ dyrektaram kłuba», — raskazvaje pres-sakratar kłuba Alaksiej Janušeŭski.
Minskaje «Tarpieda» zaŭsiody źjaŭlałasia samym biełaruskamoŭnym kłubam krainy. Pa-biełarusku viaducca sacyjalnyja sietki, sajt, robiacca prahramki, hukavoje supravadžeńnie na matčach. Sałanhin tolki padtrymlivaŭ takija pačynańni.
«Biełarusy pavinny prytrymlivacca svajoj movy, raźvivać jaje. U mianie rasijskaje hramadzianstva, ale žyvu ŭ Minsku ŭžo amal 20 hadoŭ — a značyć, treba adpaviadać hetamu miescu. Tamu my ŭ «Tarpieda» pastajanna imkniemsia da taho, kab być sapraŭdnymi biełarusami», — kazaŭ Sałanhin u intervju časopisu «Vialiki futboł».
Možna hlanuć chacia b na staronku funkcyjaniera ŭ sacyjalnaj sietcy Ukantakcie. Usie reposty vyklučna na biełaruskaj movie.
Nam udałosia źviazacca sa spadarom Sałanhinym. Jon paćvierdziŭ, što znachodzicca na terytoryi Rasii. «Rašeńnie, viadoma, abskardžvać budu. Adnak davać intervju pakul nie hatovy», — skazaŭ jon nam.
Mienavita Sałanhin pryvioŭ u kłub rasijskaha biznesoŭca Michaiła Miranienkava, kaliści raniej jon padtrymlivaŭ hrašyma žodzinskaje «Tarpieda». Z prychodam Miranienkava kłub ažyŭ, zavajavaŭ miesca ŭ pieršaj lizie, u jakoj sioleta zaniaŭ dziaviataje miesca. Mabyć, na nastupny siezon ambicyjny kłub budzie stavić pytańnie ab vychadzie ŭ elitu.
Niekatoryja biełarusy ŭ sacyjalnych sietkach apraŭdali dziejańni siłavikoŭ. Maŭlaŭ, małajcami, što vyhnali «maskala» z krainy. Adnak niamnohija viedajuć, naprykład, što Andrej Sałanhin adsiedzieŭ 10 sutak aryštu paśla Dnia Voli — 2008.
U jaho i padčas pracy ŭ kłubie źjaŭlalisia prablemy ź siłavikami. «Samaja vialikaja prablema biełaruskaha futboła — heta milicyja. Jaje supracoŭniki znachodziać usialakija pryčyny dla raznastajnych zabaron. Navat kali ściahi, jakija ludzi biaruć na stadyjon, u rejestry dazvolenych, usio roŭna zabaraniajuć. Čaplajucca da tatuirovak, nadpisaŭ na vopratcy. Pryčyny śmiachotnyja. Naprykład, kažuć: hety ściah vyhladaje fašysckim — na im namalavany kryž, jak na niamieckich tankach. Albo: na majcy šmat ahresii, a na joj usiaho tolki rok-hurt.
Na ruce tatuiroŭka «Pahonia» — nie puskajuć, sprabuješ znajści kampramis: bačyš, aŭtazak, na 15 sutak chočaš? Apranuŭ majku z nadpisam «Ultras» — fašysckaja», — kazaŭ Sałanhin u adnym ź intervju.
5 listapada dyrektar «Tarpieda» byŭ zatrymany padčas hulni ź minskaj «Zorkaj-BDU». Sałanhin sprabavaŭ razabracca, čamu na hulniu nie dazvolili pranieści fanackija baniery, tady na jaho byŭ składzieny administracyjny pratakoł, jaki i moh pasłužyć pryčynaj dla departacyi.
«PFK «Tarpieda» Minsk ličyć, što rašeńnie ab vysyłcy pryniata nie ŭ intaresach hramadskaha paradku i supiarečyć dziejučamu zakanadaŭstvu i dziaržaŭnaj palityki našaj krainy (u jakoj sport źjaŭlajecca adnym z asnoŭnych nakirunkaŭ)», — havorycca ŭ aficyjnaj zajavie kłuba.
Cikava, što ŭ Sałanhina była navat tatuiroŭka z vyjavaj emblemy «Tarpieda». «Heta dla jaho była nie praca, a žyćcio», — padsumoŭvaje Alaksiej Janušeŭski.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary