BiełaPAN
Pad naciskam žycharoŭ kamunalnaje ŭnitarnaje pradpryjemstva «Zielanbud Savieckaha rajona h. Minska» prypyniła vysiečku dreŭ u skviery Kotaŭka, paviedamiła BiełaPAN kaardynatar pravavoj słužby ekałahičnaha tavarystva «Zialonaja sietka» Maryna Dubina.
Pavodle jaje słoŭ, śpiecyjalisty «Zielanbuda» pakinuli skvier paśla taho, jak kala 30 žycharoŭ, jakija sabralisia ŭ skviery, stali pad drevy i kala śpiectechniki, pieraškadžajučy vysiečcy.
«Ssiačana dva drevy, jašče adno — nie całkam. Rabočyja sabrali halinki i źjechali. Supracoŭniki milicyi, jakich raniej vyklikali pradstaŭniki pradpryjemstva, nie ŭmiešvalisia, tolki zdymali ŭsio na kamiery i apytvali tych, chto sabraŭsia, što jany tut robiać», — raspaviała Dubina.
Jana taksama paviedamiła, što členy inicyjatyŭnaj hrupy nakiravalisia ŭ administracyju i Śledčy kamitet Savieckaha rajona, kab vykazać svajo mierkavańnie z nahody taho, što adbyvajecca. Žychary pa-raniejšamu ličać vydadzieny katalickaj parafii dazvoł na vysiečku niezakonnym.
***
Jak raniej paviedamlałasia, supołcy «Rymska-katalickaja parafija śviatych apostałaŭ Piatra i Paŭła i śviatoha Jaŭhiena de Mazeno» ŭ kastryčniku vydali novy dazvoł na praviadzieńnie budaŭniča-mantažnych rabot u skviery Kotaŭka ŭ Sielhaspasiołku.
Raniej miascovyja žychary sabrali bolš za 500 podpisaŭ pad zvarotam suprać zabudovy Kotaŭki, a taksama pad zaklikam da zabudoŭščykaŭ razhledzieć alternatyŭnyja placoŭki dla budaŭnictva. Žychary i aktyvisty taksama źviartalisia ŭ vykankam, u Minharvykankam i naŭprost da kiraŭnika katalickaj carkvy Tadevuša Kandrusieviča, jakoha prasili vybrać inšaje miesca dla budaŭnictva. Adnak u svaim adkazie na zvarot Kandrusievič paviedamiŭ, što ličyć niemetazhodnym razhlad alternatyŭnych placovak dla budaŭnictva.
7 śniežnia inicyjatyŭnaja hrupa žycharoŭ Sielhaspasiołka płanuje abmierkavać prablemy zabudovy pasiołka i skviera Kotaŭka na pryjomie ŭ staršyni Minharvykankama Andreja Šorca.
