Siertyfikacyja bytavoj techniki budzie mieć šerah niehatyŭnych nastupstvaŭ i pryviadzie da ŭščamleńnia intaresaŭ kančatkovych spažyŭcoŭ. Takoje mierkavańnie vykazali kiraŭniki biełaruskich biźnies-asacyjacyj, kamientujučy niadaŭniaje rašeńnie ŭrada ab abaviazkovaj siertyfikacyi da 1 lutaha 2017 hoda praktyčna ŭsioj bytavoj techniki, jakaja pastupaje ŭ Biełaruś
.Pryniataje rašeńnie Dziaržstandart tłumačyć tym, što ŭviadzieńnie abaviazkovaj siertyfikacyi bytavoj techniki pa patrabavańniach enierhaefiektyŭnaści «budzie sadziejničać zabieśpiačeńniu prysutnaści na rynku krainy enierhaefiektyŭnaj pradukcyi z dakładnymi zajaŭlenymi charaktarystykami».
Kiraŭniki biźnies-sajuzaŭ ličać hetu arhumientacyju sumnieŭnaj. «Orhan standartyzacyi kaža, što ŭviadzieńnie siertyfikacyi budzie spryjać pavyšeńniu enierhaefiektyŭnaści tavaraŭ, jakija prysutničajuć na biełaruskim rynku. Adnak na naša pytańnie, jak i ŭ čym my budziem vymiarać hety prahres, adkazu niama», — adznačyŭ staršynia Biełaruskaj navukova-pramysłovaj asacyjacyi Alaksandr Šviec.
Na jaho dumku, stanoŭčyja vyniki ad uviadzieńnia abvieščanaj siertyfikacyi tumannyja, tady jak admoŭnyja — całkam vidavočnyja. «Biźnies u hetym rašeńni bačyć abmiežavalnyja barjery na šlachu ruchu tavaraŭ u ramkach Jeŭrazijskaj ekanamičnaj supolnaści, i orhan standartyzacyi abaviazany z takim punktam hledžańnia ličycca», — miarkuje Šviec.
Ad uviadzieńnia siertyfikacyi ŭ kančatkovym vyniku pacierpiać spažyŭcy, dadaŭ jon. «Usie dadatkovyja vydatki biźniesu buduć zakładzieny ŭ canu spažyvieckich tavaraŭ. Siońnia chiba čas pravakavać ich padaražańnie? Pytańnie rytaryčnaje, a kali havaryć pra ŭviadzieńnie nacyjanalnaj siertyfikacyi — rašeńnie nieprapracavanaje, pryniataje biez uliku ŭsiaho kompleksu nastupstvaŭ», — skazaŭ Šviec.
Pradstaŭniki biźnies-asacyjacyj, jakija abjadnoŭvajuć pastaŭščykoŭ bytavoj techniki, prahnazujuć prykmietnaje źnižeńnie asartymientu tavaraŭ, što ŭvoziacca, pakolki ekanamičnaha sensu pravodzić siertyfikacyju tavaraŭ, jakija pastupajuć nievialikimi partyjami, nie budzie.
«Kali havorka idzie, naprykład, pra bujnahabarytnuju bytavuju techniku abo ekskluziŭnyja madeli techniki, to košt vyprabavańniaŭ moža istotna paŭpłyvać na ich canu, i pastaŭščykam pa hetaj pryčynie budzie bolš vyhadna zvuzić asartymientny pieralik, čym pradavać usiu namienkłaturu tavaraŭ», — raskazaŭ BiełaPAN hienieralny dyrektar Asacyjacyi kampanij infarmacyjnych technałohij Dźmitryj Anańjeŭ.
Kali pryniataje rašeńnie ab uviadzieńni siertyfikacyi nie admieniać, mnohija pastaŭščyki bytavoj techniki buduć vymušanyja prybrać tavary z palic kram, ličyć jon.
«Inšaje vierahodnaje nastupstva — rost šeraha rynku, to bok tavary, jakija nie majuć siertyfikataŭ, mohuć źjavicca ŭ prodažy ŭ internet-kramach», — adznačyŭ Anańjeŭ.
Pa-treciaje, pavodle jaho słoŭ, kali pastaŭščykoŭ zamiežnych tavaraŭ, jakija ŭvoziać ich z Rasii, prymusiać prachodzić nacyjanalnuju siertyfikacyju ŭ Biełarusi, rasijski bok moža pryniać miery ŭ adkaz. «U ciapierašnim vyhladzie pastanova ab uviadzieńni siertyfikacyi moža mieć niehatyŭnyja nastupstvy jak dla ŭnutranaha rynku Biełarusi, tak i dla biełaruskaha ekspartu. Vielmi vierahodna, što ŭ dačynieńni da biełaruskich vytvorcaŭ mohuć być pryniaty simietryčnyja rašeńni z boku Rasii, što moža ŭdaryć pa eksparcie ajčynnaj bytavoj techniki», — prahnazuje Anańjeŭ.
Biełaruskaja biźnies-supolnaść prapanoŭvaje albo całkam admianić pastanovu ab siertyfikacyi, albo vyklučyć ź jaje punkty, jakija tyčacca bytavoj techniki i elektroniki.
