Fota Julii Daraškievič
Ranicaj 17 śniežnia pajšoŭ z žyćcia Leanid Marakoŭ, paviedamlaje na Facebook aktyvistka Natalla Samatyja. Marakovu było 58 hadoŭ.
U jaho była puchlina hałaŭnoha mozhu. Na pačatku hoda Leanid pieranios insult.
***
Leanid Marakoŭ naradziŭsia ŭ 1958 hodzie. Pa prafiesii inžynier-radyjoelektronik. U 1990-ja jon staŭ vyvučać bijahrafiju svajho dziadźki paeta Valeryja Marakova, jaki byŭ rasstralany 29 kastryčnika 1937 hoda. Vynikam pracy stała maštabnaje daśledavańnie stalinskich represij u Biełarusi — padrychtavany i častkova vydadzieny 10-tomny encykłapiedyčny daviednik pad nazvaj «Represavanyja litaratary, navukoŭcy, rabotniki aśviety, hramadskija i kulturnyja dziejačy. 1794—1991». Usiaho sabrany źviestki pra 20 tysiač achviaraŭ.
Marakoŭ vypuściŭ taksama dakumientalnaje daśledavańnie «Achviary i karniki», dzie sabraŭ bijahrafii achviaraŭ i tych, chto maje dačynieńnie da represij u Biełarusi. Asobna vyjšła kniha, dzie sabrany źviestki pra represavanych u Biełarusi pravasłaŭnych śviataroŭ.
Leanid Marakoŭ taksama viadomy svaimi litaraturnymi tvorami, aŭtar niekalkich knih. U 2014 hodzie vyjšła jaho manahrafija «Hałoŭnaja vulica Minska. 1880—1940».
