Pierachodnaja administracyja abranaha prezidenta ZŠA Donalda Trampa nakiravała ŭ Pientahon pieralik asnoŭnych pryjarytetaŭ abaronnaj palityki, u jakim nijak nie zhadanaja Rasija. Dakumient akazaŭsia ŭ rasparadžeńni Foreign Policy.
U śpisie, jaki byŭ składzieny sa słoŭ adnaho z hałoŭnych daradcaŭ Trampa pa abaronie Miry Rykardzieł, usiaho čatyry punkty:
- Raspracavać stratehiju, kab pieramahčy/źniščyć ID;
- Stvaryć mocnuju abaronu (prybrać abmiežavańni ŭ biudžecie; palepšyć moc / pamier / hatoŭnaść vojskaŭ);
- Raspracavać paŭnavartasnuju stratehiju kibierbiaśpieki;
- Pošuk sposabaŭ pavysić efiektyŭnaść (uziać za asnovu «vialikija dasiahnieńni» namieśnika ministra Robierta Uorka: čakajem prapanoŭ ad ministerstva).
Na prośbu prakamientavać źmiest słužbovaj zapiski pradstaŭnik Trampa Džesika Dzita zajaviła, što rabić vysnovy pra pryjarytety na asnovie hetaha dakumienta było b «pamyłkaj». U Pientahonie admovilisia kamientavać dakumient, ale zaŭvažyli, što pradstaŭnikam Trampa dakładvali ab pracy na rasijskim kirunku.
Jak adznačaje Foreign Policy, pradstaŭniki Pientahona zaŭsiody nazyvali Rasieju ŭ liku asnoŭnych pahroz z punktu hledžańnia abaronnaj palityki. Niezaležnyja analityki taksama pakazvali, što mahčymy kanflikt Rasiei i NATA staić na pieršym miescy siarod imaviernych pahroz u 2017 hodzie.
Tramp padčas svajoj pieradvybarčaj kampanii i paśla pieramohi nieadnarazova padkreślivaŭ, što choča pasprabavać naładzić adnosiny z Maskvoj. Na pasadu dziaržsakratara jon pryznačyŭ kiraŭnika naftavaj kampanii Exxon Mobil Reksa Tylersana, jakoha ŭznaharodžvali rasijskim ordenam Družby za ŭmacavańnie suviaziaŭ pamiž dźviuma krainami.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary