 |
 |
 |
Masavyja aryšty pad šumok pošuku terarysta: u turmie akazalisia Ilja Bohdan z Moładzi BNF, Anton Kojpiš — palitviazień pa Spravie 14‑ci, Pavał Kurjanovič z «Eŭrapiejskaj Biełarusi», Siarhiej Vysocki z Partyi Svabody, Michaś Paškievič, Alaksandar Siarhiejenka z AHP. Dokazam «padazronaści» słužyć najaŭnaść u domie ćvikoŭ. Pravaabaroncy i rodnyja zatrymanych pa padazreńni ŭ ździajśnieńni vybuchu ŭ noč na 4 lipienia praviali pres‑kanferencyju.
Na sustreču z žurnalistami pryjšli žonka Mirasłava Łazoŭskaha Nina Šydłoŭskaja, maci Siarhieja Čysłava Halina, siastra Paŭła Kurjanoviča Palina, a taksama pravaabaroncy Valancin Stefanovič, Aleś Bialacki, Ludmiła Hraznova.
V. Stefanovič paviedamiŭ, što na dadzieny momant kolkaść zatrymanych pa padazreńni ŭ ździajśnieńni vybuchu ŭ noč na 4 lipienia składaje 14 čałaviek. Heta Siarhiej Vysocki, Pavał Kurjanovič, Siarhiej Čysłaŭ, Mirasłaŭ Łazoŭski, Illa Bohdan, Anton Kojpiš, Viktar Laščynski, Taciana Piekun, Ihar Korsak, Alaksandar Siarhiejenka, Michaś Paškievič, Kiryła Paŭłoŭski, Vital Stažaraŭ i adzin nieviadomy pakul pravaabaroncam čałaviek.
 Maci aryštavanych Siarhieja Čysłava i žonka Mirasłava Łazoŭskaha dziažurać kala turmy. Usiaho ŭviaźnili prynamsi 14 čałaviek ź siami roznych partyj i supołak. Dokazam "padazronaści" słužyć najaŭnaść u domie ćvikoŭ. |
Na dumku Niny Šydłoŭskaj, siońnia možna kazać pra cełuju chvalu zatrymańniaŭ.
«Pavodle tych matyvaŭ, pa jakich zatrymali hetych ludziej, možna aryštavać usio darosłaje nasielnictva krainy — ad prostaha aŭtaamatara da chatniaj haspadyni», — padkreśliła jana.
Spn. Šydłoŭskaja ličyć, što śledztva namahajecca zabić adrazu dvuch zajcoŭ — zapałochać apazycyju i prademanstravać aktyŭnaść u spravie raśśledavańnia zdareńnia. Jana zajaviła, što zvaroty da kiraŭnictva MUS nakont taho, čamu zatrymańni ładzić KDB u toj čas, jak sprava kvalifikavanaja jak złosnaje chulihanstva i znachodzicca ŭ vyklučnaj jurysdykcyi milicyi, nia majuć adkazaŭ. Zatoje, pa słovach N. Šydłoŭskaj, prahavaryŭsia načalnik upravy KDB pa Miensku i Mienskaj vobłaści, jaki zajaviŭ, što zatrymanych byłych siabroŭ «Biełaha lehijonu» naležyć pravieryć na datyčnaść da niezarehistravanaj destruktyŭnaj arhanizacyi. Pavodle pravaabaroncaŭ, toj kamentar paśla źnik i bolš nia zhadvajecca.
Pravaabaronca Aleś Bialacki vykazaŭ škadavańnie z nahody, što Łukašenka pačaŭ «palavańnie na viadźmarak». My majem palicejskuju dziaržavu, jakaja cudoŭna prasłuchoŭvaje telefony aktyvistaŭ apazycyi, ale absalutna nia zdolnaja zmahacca z sapraŭdnym teraryzmam, zaznačyŭ sp. Bialacki. Na jaho dumku, toje, jak viadziecca śledztva, dazvalaje kazać pra razhortvańnie palityčnaha teroru ŭ krainie. Paćvierdžańniem tamu — aryšt vyklučna byłych i dziejsnych siabroŭ apazycyjnych palityčnych arhanizacyj. Pravaabaronca dadaŭ, što ŭsio heta vielmi pakazalna kładziecca na budučuju vybarčuju kampaniju, bo častka aryštavanych źjaŭlajecca jaje aktyŭnymi ŭdzielnikami.
 |
Pa słovach pravaabaroncy Valancina Stefanoviča, abvinavačańni na adras zatrymanych vielmi surjoznyja, bo asudzić ich mohuć pavodle artykułu, jaki praduhledžvaje źniavoleńnie da 10 hadoŭ.
«U nas jość źviestki, što dziažurnyja advakaty rajać zatrymanym adkazvać na ŭsie pytańni. I tady, maŭlaŭ, ich adpuściać damoŭ. Heta vyklikaje tryvohu» — raspavioŭ sp. Stefanovič.
Jon dadaŭ, što ŭsim zatrymanym buduć pradstaŭlenyja novyja abaroncy. Na siońnia ŭsie padazravanyja atrymali pieradačy ad rodnych, u tym liku i ŭradženiec Viciebskaj vobłaści Viktar Laščynski. Pravaabaronca zaznačyŭ, što na dadzieny momant ciažka prasačyć suviaź apošniaha incydentu z padziejami 2005 hodu ŭ Viciebsku. Pry hetym jon nahadaŭ pra Paŭła Krasoŭskaha z Žodzina, na jakoha chacieli pačapić adkaznaść za tyja vybuchi, šantažujučy adkaznaściu za seryju zabojstvaŭ i zhvałtavańniaŭ. Jość niebiaśpieka vykarystańnia padobnych metadaŭ i ŭ hetaj spravie, pieraściaroh V. Stefanovič.
Pravaabaronca Ludmiła Hraznova źviarnułasia da kiraŭnictva MUS, KDB, Administracyi prezydenta i Ministerstva justycyi. Pa jaje słovach, adkaznaść za ciapierašniuju sytuacyju i pahrozu mahčymaha hramadzkaha kryzisu lažyć i na hetych strukturach. Spn. Hraznova zaklikała ŭłady kiravacca vyklučna zakonam i Kanstytucyjaj.
Palina Kurjanovič raspaviała pra akaličnaści zatrymańnia svajho brata: učora ŭviečary paśla biasplonnaha dźviuchhadzinnaha pieratrusu jaho ŭsio adno zatrymali. Spravu viadzie śledčy KDB pa asabliva važnych spravach. Palina zaklikała palityčnyja partyi bajkatavać vybary i skancentravać svaju dziejnaść na spynieńni pieraśledu svaich aktyvistaŭ.
Dziela abjektyŭnaha i ŭsiebakovaha raśledvańnia da pracy treba padklučyć starońnich specyjalistaŭ, a taksama naładzić paŭnavartasnaje aśviatleńnie padziejaŭ u ŚMI, upeŭnienyja rodnyja zatrymanych i pravaabaroncy.
 |
