 Halina Čysłava |
Siarhiej jašče ŭ savieckaj vajskovaj vučelni arhanizavaŭ vajskovy hurtok ź biełarusaŭ, što vučylisia razam ź im, pryhadała Halina Čysłava. Spačatku načalstva adobryła hetuju ideju, ale pačuŭšy ad udzielnikaŭ hurtka biełaruskuju movu, spravu prypyniła, a jaje inicyjatara pa skančeńni vučoby raźmierkavali za Bajkał. Miesca pracy znachodziłasia ŭ niepasrednaj blizkaści da ŭranavych rudnikoŭ. Takoje susiedztva potym zaŭvažna adbiłasia na zdaroŭi vajskoŭca-biełarusa. Viarnuŭšysia z vojska, maryŭ stvaryć nacyjanalnuju hvardyju. Adbyvałasia heta na chvali pierabudovy i nastupnaha zdabyćcia niezaležnaści.
Halina Čysłava pryhadała taksama adzin pakazalny epizod z žyćcia syna, što adbyŭsia naprykancy 90-ch. U 1996 hodzie Siarhieja aryštavali za ŭdzieł u Čarnobylskim šlachu. A vosieńniu zdaryłasia nastupnaje. Jedučy ŭ tralejbusie jon zaŭvažyŭ sačeńnie. Zdoleŭ vyrvacca i patrapić na aŭtavakzał. Tam jaho čakaŭ siabar, ź jaki jany na aŭtobusie nakiravalisia ŭ Słucak. Za imi vypraviłasia niekalki lehkavikoŭ. U Słucku na prypynku nieviadomyja pierachapili chłopcaŭ, spravakavali bojku i zapichnuli ich u aŭto. Advieźli ŭ les i mocna źbili. Potym skryvaŭlenaha Siarhieja spytali, dzie jaho lepiej zakapać. Jon adkazaŭ, što siońnia zakapajuć jaho ź siabram, a zaŭtra ich. Źbitych pakinuli ściakać kryvioj u lesie. Siarhiej niekalki kilametraŭ nios nieprytomnaha siabra da horadu. Nieviadomy kiroŭca padabraŭ ich i advioz u balnicu. Siarhiej pravioŭ u reanimacyi troje sutak ŭ nieprytomnaści. U jaho byli paškodžanyja vantroby, na hałavie zastałosia šeść šnaraŭ. Niezadoŭha da heta incydentu «Narodnaja hazeta» nadrukavała artykuł, u jakim viałosia pra toje, što «Bieły lehijon» rychtuje dziaržaŭny pieravarot.
