Ukrainskija radykalnyja nacyjanalisty adznačajuć 1 studzienia dzień naradžeńnia Ściapana Bandery. Bandera byŭ stvaralnikam Arhanizacyi ŭkrainskich nacyjanalistaŭ, što viała ŭzbrojenuju baraćbu za niezaležnaść suprać polskich, savieckich i niamieckich akupantaŭ Ukrainy.
Nacyjanalistyčnyja ruchi ŭ hety dzień pravodziać svaje tradycyjnyja šeści z pachodniami. Pryčym hieahrafija ich praviadzieńnia ŭ apošnija hady pašyrajecca. Kali raniej jany adbyvalisia ŭ Lvovie, dyk z 2000-ch taksama — u Kijevie, a apošnija hady jašče i Charkavie, Adesie.
Sioleta šeście maje adbycca taksama ŭ Słaviansku — horadzie na Danbasie, vyzvalenym ad rasijskich bajevikoŭ u 2014 hodzie.
Postać Ściapana Bandery — pravadyra Arhanizacyi ŭkrainskich nacyjanalistaŭ (AUN) u 1930—50-ja hady — vyklikaje rezkaje nieprymańnie ŭ Rasii, bo jon arhanizavaŭ masavy i paśpiachovy ŭzbrojeny supraciŭ Maskvie.
Ukrainskija historyki padzialilisia ŭ acency Bandery. Nacyjanalisty i dziaržaŭniki vysoka aceńvajuć jahonuju postać, libierały i levyja staviacca da jaho niehatyŭna.
Z adnaho boku, jon uznačaliŭ uzbrojenuju baraćbu za niezaležnaść Ukrainy spačatku suprać palakaŭ, paśla proci nacystaŭ i savietaŭ. Z druhoha boku, jahonaja arhanizacyja vykarystoŭvała terarystyčnyja mietady. U vajnie suprać palakaŭ AUN raspaŭsiudziła teror na mirnaje nasielnictva. U pieryjad da 1941 hoda AUN supracoŭničała ź niamieckimi nacystami. Urešcie, praŭda, niemcy adpravili kiraŭnikoŭ AUN, u tym liku Banderu, u kancłahier, kali tyja pasprabavali abviaścić Ukrainu niezaležnaj.
Banderu ŭdałosia zrabić ukrainski niezaležnicki ruch masavym i papularnym.
Banderu zabiŭ ahient savieckaha KHB, jaki ŭ vyniku raskajaŭsia ŭ svaim učynku i pierabieh na Zachad.
Prezident Juščanka nadaŭ Banderu zvańnie Hieroja Ukrainy. Janukovič hety ŭkaz admianiŭ.
Ukrainskija nacyjanalisty ŭšanoŭvajuć čyrvona-čorny ściah AUN pobač ź dziaržaŭnym, žoŭta-błakitnym.
Pravanacyjanalistyčnyja partyi ciapier nabirajuć istotny pracent hałasoŭ nie tolki na zachadzie — kałyscy AUN, ale i ŭ centry krainy. Nacyjanalistyčnyja idei atrymali novaje raspaŭsiudžańnie va Ukrainie ŭ adkaz na zachop Rasijaj Kryma i častki Danbasa ŭ 2014-m.
Kamientary