6-pakajovy budynak u Motali kaštuje ŭsiaho 15 tysiač dalaraŭ.
Baćkoŭskaja chata pieršaha prezydenta Izrailu Chaima Vejcmana znachodzicca na Paleśsi, u miastečku Motal. Pra prodaž doma za 15 tysiač dalaraŭ zajaviła niekalki miesiacaŭ tamu ciapierašniaja ŭładalnica — pensijanerka Alena Ptašyc. Pakupnikoŭ pakul nie znajšłosia.
Pieršy prezydent Izrailu Chaim Vejcman naradziŭsia ŭ Motali ŭ 1874 hodzie ŭ siamji handlara lesam. Kažuć, što jakraz baćku Chaima, Ezeru Vejcmanu, i naležała ideja hetaj budoŭli. Haspadar chacieŭ, kab chata była vysokaja, prastornaja. Akramia budučaha izrailskaha prezydenta, u siamji raśli jašče 14 dziaciej.
Jak i Chaim, usie jany atrymali vydatnuju adukacyju ŭ Eŭropie. Sam Vejcman paśla skančeńnia Pinskaj himnazii vučyŭsia ŭ Niamieččynie i Švajcaryi, byŭ prafesaram chimii ŭ Anhielščynie.
U 1894 hodzie siamja Vejcmanaŭ źjechała z Motala. Paźniej haspadary ŭ ichnym domie mianialisia nieadnojčy. Paśla vajny tut mieścilisia roznyja savieckija ŭstanovy. Dom nieadnojčy pierarablaŭsia, pry kancy 1970-ch draŭlany budynak pieranieśli z centralnaj vulicy. Potym dom iznoŭ pieraviali ŭ pryvatny sektar. Ciapier u im šeść pakojaŭ. Pry Vejcmanach było vosiem. Źmianiłasia miesca ŭvachodu, inšym staŭ dach. Adnak toje-sioje zastałosia. Naprykład, znadvornyja šalavanyja ścieny, azdoblenyja raźboju vokny...
Ciapierašniaja ŭładalnica domu, pensijanerka Alena Ptašyc žyvie ŭ chacie razam z maci. Darosłyja dzieci Aleny raźjechalisia pa krainie. Jana nia ŭ stanie ŭtrymlivać hetaje vialikaje zbudavańnie.
Cana, jakuju nazyvaje Alena Ptašyc, davoli zvykłaja, jak na Motal —15 tysiač dalaraŭ. Achvotnych nabyć chatu pakul tak i nie znajšłosia. Adnak Alena nia tracić nadziei i vieryć u dobraha pakupnika. Tym bolš što ŭ Motal apošnim časam pryjaždžaje niamała haściej ź Izrailu.
“Kali, moža, daduć bolej za 15 tysiač, dyk ja vaźmu i bolej, — kaža Alena. — Vialikaja chata. My jaje padtrymlivajem u paradku, bo žyviem tut. A siudy jeduć i jeduć ekskursii. Jak habrei, tak i nie habrei”.
Dyrektarka miascovaha muzeju Volha Macukievič pierakananaja, što dziaržava pry žadańni zmahła b zrabić z hetaha doma sapraŭdnuju prynadu dla turystaŭ.
