U biełarusaŭ, jakija prybyvajuć u rasijskija aeraporty, pačali praviarać pašparty

U hramadzian Biełarusi, jakija prybyvajuć u rasijskija aeraporty, pačali praviarać pašparty. Ci stanie pašpartny kantrol pastajannym, zaležyć ad damoŭlenaściaŭ pamiž MZS Rasii i Biełarusi, zajavili ŭ rasijskaj pahransłužbie.

Pavialičyć

Biełarusy, jakija prybyvajuć na samalocie ź Minska ŭ Maskvu, paviedamlajuć u sacsietkach, što rasijskija pamiežniki stali praviarać u ich pašparty, choć rejs ličycca ŭnutranym i raniej takich pravierak nie było. U vyniku pasažyry vymušanyja bolš času pravodzić u aeraporcie.

Jak patłumačyli BiełaPAN u pahraničnaj słužbie FSB Rasii, heta časovaja miera, źviazanaja z tym, što zafiksavana šmat parušeńniaŭ pry pierasiačeńni miažy ź Biełarusi. Hramadzianie trecich krain zaŭsiody pavinny byli prachodzić pašpartny kantrol, rastłumačyli ŭ pahransłužbie. Pakolki ŭ natoŭpie pasažyraŭ składana vyjavić, u kaho biełaruski pašpart, a ŭ kaho — zamiežny, praviarajucca ŭsie, chto prybyvaje ź Biełarusi ŭ Rasiju.

Ci stanie pašpartny kantrol u rasijskich aeraportach pastajannym, zaležyć ad damoŭlenaściaŭ pamiž ministerstvami zamiežnych spraŭ Rasii i Biełarusi. Ciapier heta pytańnie razhladajecca na ŭzroŭni źniešniepalityčnych viedamstvaŭ, paviedamili ŭ rasijskaj pahransłužbie.

Tam taksama zapeŭnili, što heta miera nie źviazanaja z uviadzieńniem Biełaruśsiu piacidzionnaha biaźvizavaha režymu dla zamiežnikaŭ (zhodna z ukazam prezidenta Biełarusi ad 9 studzienia dla hramadzian 80 krain, jakija prybyvajuć praz Nacyjanalny aeraport Minsk, z 12 lutaha budzie dziejničać piacidzionny biaźvizavy režym).

Aficyjny pradstaŭnik Dziaržaŭnaha pahraničnaha kamiteta Biełarusi Anton Byčkoŭski paviedamiŭ, što ź biełaruskaha boku takich novaŭviadzieńniaŭ niama. «U Nacyjanalnym aeraporcie Minsk pašpartny kantrol hramadzian Biełarusi i Rasii na ŭnutranych rejsach pa-raniejšamu nie ažyćciaŭlajecca, pamiežniki pracujuć u štatnym režymie», — skazaŭ jon.

U MZS Biełarusi situacyju nie kamientujuć.

Naziemny kantrol na biełaruska-rasijskaj miažy staŭ bolš žorstkim ź listapada 2016 hoda. Zamiežnikam pa sutnaści zabaranili tranzitam jechać ź Biełarusi ŭ Rasiju — jany mohuć patrapić tudy tolki praź mižnarodnyja punkty propusku. Na miažy pamiž Biełaruśsiu i Rasijaj takich niama, tamu zamiežnym turystam zastajecca jechać u abjezd praz Łatviju abo praz punkt propusku «Novyja Jurkavičy» ŭ Branskaj vobłaści, jaki maje status mižnarodnaha, bo znachodzicca na styku miežaŭ Biełarusi, Ukrainy i Rasii.

• 0
• 0
• 0
• 0
• 0
• 0
• 0
• 0