Kampanija «Havary praŭdu» bačyć asnovu raźvićcia Biełarusi ŭ dyjałohu hramadstva i ŭłady, zajaviŭ sustaršynia arhanizacyi Andrej Dźmitryjeŭ 17 studzienia na pres-kanfierencyi ŭ Minsku.
«Kab dyjałoh byŭ paśpiachovym, važnym elemientam źjaŭlajecca toje, chto jaho budzie vieści, chto budzie pradstaŭlać hramadstva. Nam patrebny lidary, zdolnyja być pasiarednikami pamiž hramadstvam i ŭładaj, — skazaŭ Dźmitryjeŭ. — U nas jość paśpiachovy dośvied u Minsku: heta Taćciana Karatkievič. Kab pieramieny stali niezvarotnymi, nam treba sto Taćcian Karatkievič. U kožnym rehijonie, kožnym rajonie pavinna źjavicca svaja Taćciana Karatkievič. My budziem znachodzić, navučać i padtrymlivać rehijanalnych lidaraŭ».
Pavodle słoŭ Dźmitryjeva, ciapier usie dasiahnieńni dyjałohu hramadstva i ŭłady abmiežavanyja Minskam. «Ale kali pieramienaŭ niama ŭ rehijonach, značyć, ich niama i ŭ Biełarusi. U Minsku mohuć być novyja tendencyi, ale tolki vychad za miežy stalicy zmoža zrabić pieramieny ŭstojlivymi», — ličyć jon.
Dźmitryjeŭ paviedamiŭ, što dla «Havary praŭdu» pryjarytetnym budzie «raźvićcio dyjałohu pamiž hramadstvam i miascovaj uładaj, padtrymka miascovych lidaraŭ». «Asnovaj pieramienaŭ źjaŭlajecca dyjałoh. Kali my nie abjadnajemsia, to čynoŭniki pa-raniejšamu buduć rabić vyhlad, što našy prablemy — heta adzinkavy vypadak, vyklučeńnie z praviłaŭ, a nie toje, što patrabuje ich uvahi. Dla taho kab čynoŭniki nie rabili vyhlad, što ŭ cełym usio dobra, nam važna, kab ab prablemach kazała šmat čałaviek adnačasova», — skazaŭ palityk.
Jon adznačyŭ, što «Havary praŭdu» ŭ hetym hodzie praviadzie ŭ kožnym rehijonie forumy «Za mirnyja pieramieny». Dźmitryjeŭ nahadaŭ, što ŭ listapadzie 2016 hoda anałahičny forum prajšoŭ na respublikanskim uzroŭni ŭ Minsku. «Na forumie ludzi atrymali trybunu, mahčymaść skazać, što dla ich važna. My prapanoŭvajem nie iści ŭśled za palitykami, a samim sfarmiravać palityčny paradak dnia. Hetyja forumy pavinny stać pačatkam dyjałohavych placovak u rehijonach. Nam važna, kab dyjałoh davaŭ vynik», — zajaviŭ sustaršynia kampanii.
«Ciapier my ŭ samym pačatku šlachu, ale ŭ nas chopić ciarpieńnia i ŭpartaści, kab hołas ludziej byŭ pačuty», — zajaviŭ Dźmitryjeŭ.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary