«Źviazda» admoviłasia nadrukavać artykuł deputatki Anisim — tekst artykuła

«Hety tekst byŭ padrychtavany naprykancy 2016 h. i adasłany dla publikacyi ŭ hazietu «Źviazda», niekalki dzion tamu adtul byŭ dasłany adkaz pra niemahčymaść nadrukavać hety materyjał, — piša ŭ siabie ŭ fejsbuku deputatka Alena Anisim. — Ja pierasłała jaho ŭ orhan TBM «Naša słova» dla druku, a taksama vyrašyła raźmiaścić na svajoj staroncy», — adznačaje jana.

My padumali, što dadzienaja spravazdača moža być cikavaja i dla čytačoŭ «Našaj Nivy».

Karotkaja spravazdača deputata Pałaty pradstaŭnikoŭ Nacyjanalnaha schodu Respubliki Biełaruś pa Staŭbcoŭskaj vybarčaj akruzie № 70 Aleny Anisim

Krychu statystyki

Za pieryjad z 11 kastryčnika pa 30 śniežnia 2016 h. ja praviała čatyry sustrečy z žycharami Staŭbcoŭskaha i Niaśvižskaha rajonaŭ sumiesna z pamočnikam Novikam M. M., jaki pracuje na stałaj asnovie ŭ h. Stoŭbcy. Akramia taho, moj pamočnik pravioŭ jašče 15 pryjomaŭ (pa 2 pryjomy ŭ tydzień na praciahu 2-ch miesiacaŭ).

Za hety čas ja atrymała kala 60 zapytaŭ: padčas pryjomu, u vyhladzie elektronnych i piśmovych listoŭ, telefonnych zvankoŭ i padčas sustreč z hramadzianami. Padrychtavała bolš za 50 piśmovych adkazaŭ i zapytaŭ pa zvarotach.

Z karotkaj praktyki chaču padzialicca z čytačami niekatorymi razvahami.

Pytańni łakalnaha charaktaru

Prablemy, jakija ŭzdymajucca padčas pryjomu i ŭ listach, majuć jak łakalny, tak i ahulnadziaržaŭny charaktar. Tamu i vyrašać ich davodzicca na adpaviednym uzroŭni. Tak, biezumoŭna, u kampietencyi miascovaj ułady znachodziacca pytańni pracaŭładkavańnia, jakaści daroh, vulic, akazańnie pasłuh u sistemie ŽKH, transpartnaje zabieśpiačeńnie pamiž rajcentram i nasielenymi punktami, absłuhoŭvańnie ŭ bankaŭskaj sistemie, nadańnie vulicam imionaŭ viadomych ludziej i inš. I sioje-toje ŭdałosia vyrašyć, dziakujučy reahavańniu miascovych uładaŭ na zapyty ludziej. Ale i tut uźnikajuć pytańni, jakija zadajuć hramadzianie, što patrabujuć reahavańnia na ahulnadziaržaŭnym uzroŭni. Naprykład, nakont darožnaha zboru, jaki biarecca z usich aŭtamabilistaŭ, tym nie mienš, hrošaj na ramont daroh čamuści nie chapaje. Vykazvajecca adna z prapanoŭ, kab darožny zbor pieranieści ŭ śfieru apłaty za paliva (bienzin), tady toj, chto jeździć bolej, budzie płacić bolš. A chto mała jeździć, naprykład, piensijaniery, jakija karystajucca ŭłasnym aŭtamabilem ŭsiaho niekalki miesiacaŭ u hod, adpaviedna zapłaciać mienš. Davoli spraviadlivy padychod. Zastajecca tolki praduhledzieć, jak pieravieści peŭny pracent apłaty za bienzin u darožny, umoŭna kažučy, fond. Ci atrymaje padtrymku takaja prapanova, pakul nieviadoma. Ale, dumajecca, jana vartaja ŭvahi i abmierkavańnia.

Pytańni ahulnadziaržaŭnaha maštabu

My šmat čujem i havorym pra sacyjalnuju skiravanaść našaj krainy. I sapraŭdy, niamała robicca ŭ hetym płanie stanoŭčaha. Ale toje, što datyčyć niekatorych faktaŭ z žyćcia asobnych nieabaronienych hrup, naprykład, invalidaŭ, zastajecca pa-za ŭvahaj. Tak, pavodle zapytaŭ u Staŭbcoŭskim rajonie šmat chto sutykajecca z prablemaj zabieśpiačeńnia pravoŭ sirot, niekatoryja ź jakich źjaŭlajucca invalidami ź dziacinstva. U kožnym takim vypadku treba raźbiracca indyvidualna, ale ž pavinien być stvorany miechanizm pravavoj abarony na ahulnabiełaruskim uzroŭni. Svajaki, jakija prajaŭlajuć kłopat u dačynieńni plamieńnikaŭ ci ŭnukaŭ, hublajuć ilhoty pa apłacie padatkaŭ, a to i abkładajucca dadatkovymi padatkami za toje, što dajuć takim sirotam prytułak. Heta śviedčyć pra niedaskanałaść našaj pravavoj sistemy. Napeŭna, takija prablemy jość i ŭ inšych rajonach Biełarusi, a nie tolki ŭ majoj akruzie.

Ukaz № 100, jaki rehuluje pytańni adčužeńnia starych i pustych damoŭ u vioscy, nie moža prymianiacca ŭ dačynieńni da nieaformlenych va ŭłasnaść pabudoŭ. Značyć, taksama patrabuje ŭdakładnieńnia miechanizm jaho prymianieńnia. Vidavočna, što ŭ dadzienym vypadku my pavinny vieści havorku pra ŭkaranieńnie instytuta pryvatnaj ułasnaści jak na pabudovy, tak i na ziamielnyja ŭčastki. Bo biez ułaśnika składana dabicca naležnaha vyhladu tych siadzibaŭ, u jakich haspadary nie žyvuć stała i fihurujuć tolki jak spadčyńniki.

Vostryja pytańni

U majoj siońniašniaj deputackaj dziejnaści ja sutyknułasia i z šeraham niaprostych pytańniaŭ. Rašeńnie ich patrabuje, pa-pieršaje, publičnaści, a pa-druhoje, adpaviednaha reahavańnia kampietentnych orhanaŭ.

Tak, zaraz u presie ŭsio čaściej źjaŭlajucca materyjały, jakija śviedčać pra sistemu paboraŭ z vychavacielaŭ daškolnych ustanoŭ i z nastaŭnikaŭ na padpisku časopisaŭ, jakija nie vykarystoŭvajucca ŭ ich prafiesijnaj dziejnaści, a taksama na inšyja mety, niepraduhledžanyja ni kantraktnaj sistemaj, ni vytvorčaj nieabchodnaściu. Takaja praktyka zboru najaŭnych hrošaj, vidavočna, śviedčyć pra niedachopy viadzieńnia finansavaj dziejnaści ŭ niekatorych ustanovach adukacyi. Akramia taho, maładyja śpiecyjalisty, majučy nizkuju zarpłatu, navat pry vialikaj simpatyi da svajoj prafiesii, sutyknuŭšysia z padobnymi paborami, naŭrad ci zachočuć zastavacca pracavać u takoj sistemie. I heta stanovicca ahulnadziaržaŭnaj prablemaj, jakuju stvarajuć niekatoryja kiraŭniki ŭstanoŭ adukacyi.

Usio bolšy rozhałas nabyvaje praktyka viadzieńnia budaŭnictva žyłych damoŭ, jakaja supravadžajecca niekantralavanaj vysiečkaj dreŭ u parkavych zonach. Dumka žycharoŭ ihnarujecca, asablivaje abureńnie vyklikajuć fakty, kali zabudova viadziecca ŭ miescach, dzie adbyvalisia masavyja rasstreły hramadzian u roznyja časy historyi. Pra heta paviedamlajuć žychary Homiela ŭ svaim zapycie na majo imia.

Nie mahu abyści svajoj uvahaj i vostraje pytańnie pra kanfiskacyju majomaści ŭ pradstaŭnikoŭ małoha i siaredniaha biźniesu za niaznačnyja parušeńni ŭ dziejnaści, jak naprykład, niedakładnaje afarmleńnie TTN i pad.

Ja raspaviała tolki pra niekatoryja zapyty. Tamu hety vielmi karotki ahlad daje minimalnaje ŭjaŭleńnie pra toje, z čym i jak sutykajucca deputaty, i ja ŭ tym liku, u svajoj siońniašniaj dziejnaści. Pa niekatorych pytańniach, datyčnych pravavoha zabieśpiačeńnia sirot i invalidaŭ, udaskanaleńnia pradprymalnickaj dziejnaści maim pamočnikam užo padrychtavany i rychtujucca prapanovy ŭ adpaviednyja zakonaprajekty.

Što zastałosia za kadram

U adznačany pieryjad ja prymała ŭdzieł u niekalkich kanfierencyjach, a taksama ŭ pasiedžańniach kruhłych stałoŭ, nieadnarazova zdymałasia ŭ telepieradačach na kanałach ANT, «Biełaruś-1», Biełsat, davała intervju drukavanym ŚMI i na radyjo pa aktualnych pytańniach. Pa zaprašeńniach dypłamatyčnych misij naviedvała aficyjnyja pryjomy.

Što dalej

Prablem u našaj adnosna maładoj niezaležnaj krainy naźbirałasia šmat. Tamu i pracavać davodzicca šmat. Raduje, kali ludzi padymajuć nie tolki asabistyja pytańni, ale turbujucca pra toje, jaki imidž maje Biełaruś, nakolki kamfortna nam u joj žyć, prapanujuć sposaby vyrašeńnia važnych dla krainy pytańniaŭ. Heta daje nadzieju na toje, što kali ŭładnyja struktury buduć čuć zapyty ludziej i vyrašać ich u intaresach hramadzian na padstavie zakona, to razam my zmožam razhrebci tyja zavały, jakija zaminajuć nam pačuvacca sapraŭdnymi haspadarami ŭ svajoj krainie.

• 0
• 0
• 0
• 0
• 0