Deputat Pałaty pradstaŭnikoŭ, člen Abjadnanaj hramadzianskaj partyi Hanna Kanapackaja 21 studzienia nakiravała prapanovy ab źmienie vybarčaha zakanadaŭstva ŭ mižviedamasnuju pracoŭnuju hrupu pa vyvučeńni rekamiendacyj Biuro pa demakratyčnych instytutach i pravach čałavieka (BDIPČ) ABSIE pry Centrvybarkamie. Pra heta paviedamiła pres-sakratar AHP Hanna Krasulina.
Prapanovy raspracavanyja stvoranaj u vieraśni 2016 hoda pa inicyjatyvie apazicyi ekśpiertnaj hrupaj, u skład jakoj uvajšli pradstaŭniki AHP, arhkamiteta pa stvareńni partyi «Biełaruskaja chryścijanskaja demakratyja», ruchu «Za Svabodu», partyi «Zialonyja», Biełaruskaj partyi levych «Spraviadlivy śviet». U pracy hrupy brali ŭdzieł eks-sudździa Kanstytucyjnaha suda Michaił Pastuchoŭ, staršynia Viarchoŭnaha Savieta 13-ha sklikańnia Miečasłaŭ Hryb, ekśpiert u halinie vybarčaha prava Siarhiej Alfier i inšyja.
Siarod raspracavanych rekamiendacyj — pierachod na źmiešanuju, praparcyjna-mažarytarnuju vybarčuju sistemu, a taksama norma ab tym, što pradstaŭniki kožnaha kandydata pavinny być abaviazkova ŭklučanyja ŭ skład vybarčych kamisij. Na dumku ekśpiertaŭ, nieabchodna taksama zakanadaŭča zamacavać normu, jakaja harantuje adkryty i hałosny padlik hałasoŭ, kab kožny člen kamisii i naziralnik moh bačyć źmiest kožnaha biuletenia. Aŭtary prapanoŭ ličać važnym abmiežavać praktyku daterminovaha hałasavańnia — skaracić jaho termin da dvuch dzion z abaviazkovym paviedamleńniem ad hramadzian ab niemahčymaści hałasavać u asnoŭny dzień vybaraŭ.
Na minułym tydni Kanapackaja atrymała z CVK adkaz na svoj zvarot z prośbaj ab uklučeńni ŭ skład mižviedamasnaj hrupy pa vyvučeńni rekamiendacyj BDIPČ ABSIE. Staršynia Centrvybarkama Lidzija Jarmošyna paviedamiła, što ŭ składzie hrupy ŭžo pracujuć dvoje deputataŭ, nakiravanych kiraŭnictvam Pałaty pradstaŭnikoŭ, i pa hetaj pryčynie deputata ad AHP u hrupu ŭklučać nie stali. Pry hetym Jarmošyna padkreśliła, što deputat moža nakiravać u hrupu svaje prapanovy.
Ź lutaha 2016 hoda pracuje stvoranaja CVK pa daručeńni Alaksandra Łukašenki mižviedamasnaja ekśpiertnaja rabočaja hrupa pa vyvučeńni rekamiendacyj BDIPČ ABSIE, dadzienych pa vynikach prezidenckich vybaraŭ 2015 hoda dla ŭdaskanaleńnia vybarčaha pracesu ŭ Biełarusi. Paśla letašnich parłamienckich vybaraŭ, padčas jakich u mietadyčnych materyjałach dla vybarkamaŭ byli adlustravanyja niekalki rekamiendacyj BDIPČ, jakija nie źjaŭlajucca hałoŭnymi, kamisija praciahvaje svaju pracu. U kancy śniežnia ŭ jaje pasiadžeńni ŭziaŭ udzieł vice-staršynia Parłamienckaj asamblei ABSIE Kient Charstied.
Čakajecca, što da 1 lutaha hrupa praviadzie analiz rekamiendacyj ABSIE pa vynikach parłamienckich vybaraŭ i vypracuje prapanovy dla źmieny vybarčaha zakanadaŭstva.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)