Nacyjanalnaje ahienctva pa turyźmie vydała brašuru «100 rečaŭ, jakija treba zrabić u Biełarusi». Pra heta paviedamiła siońnia žurnalistam načalnik adździeła Nacahientstva pa turyźmie Iryna Hardzijenka, pieradaje BiełTA.
fota Viktara Małyščyca
Vydańnie pazicyjanujecca jak unikalny hid pa samych jarkich uražańniach dla padarožža pa Biełarusi. «Hetyja 100 sakretaŭ z dušoj abrali miascovyja žychary, kab bližej paznajomić sa svajoj krainaj, dzie kožny znojdzie sabie zaniatak», — raspaviali vydaŭcy.
Turystam prapanujuć pabyvać u samych roznych kutkach krainy — ad tusovačnaj vulicy Zybickaj u Minsku da muzieja staradaŭnich rečaŭ na haryščy zvyčajnaha doma ŭ Iŭi. Brašura raspaviadaje ab čaroŭnych miescach, dzie pryniata zahadvać žadańni, i naziralnych placoŭkach, adkul možna źniać najlepšyja vidy krainy — i heta nie tolki Minsk. Nie zabylisia składalniki i pra IT-brendy krainy: prapanujecca zrabić fota z tankam na radzimie lehiendarnaj hulni «World of Tanks» i sieryju sełfi z vydatnymi miaścinami Biełarusi ŭ dadatku MSQRD. Pakatacca na BiełAZie, prajścisia ŭ bałotastupach, razhadać zahadku zabojstva Kieniedzi, ubačyć simvały savieckaj epochi — tolki niekatoryja punkty ź śpisu.
Biełaruś daje mahčymaść być bližej da pryrody: tut rajać źbirać hryby i jahady, słuchać śpievy ptušak u lesie, ździajśniać viełaprahułki i safary, spleści vianok z vasilkoŭ i sustreć śvitanak na bierazie voziera. U śpisie jość i niestandartnyja varyjanty snu — pieranačavać na sienavale, na pčalinych vullach u ahrasiadzibie abo ŭ kajucie płyvučaj haścinicy.
fota Viktara Małyščyca
Amataram hastranamičnaha turyzmu prapanujecca nie tolki pakaštavać stravy nacyjanalnaj kuchni, ale i samim paŭdzielničać u zbory ŭradžaju i navučycca zdabyvać biarozavy sok. U śpisie dla dehustacyi — žuraviny ŭ cukry, płambir, žytni chleb, čaj z palavych i lasnych traŭ, samahonka z zakuskaj z ahurka i miodu.
Dla zručnaści top-100 raźbili na čatyry błoki zaniatkaŭ, jakija buduć cikavyja viasnoj, letam, vosieńniu i zimoj. Vydańnie budzie dastupna na 8 movach: ruskaj, polskaj, niamieckaj, anhlijskaj, francuzskaj, kitajskaj, arabskaj i iŭrycie.
U Nacahientstvie pa turyźmie abiacajuć, što pakiet proma-pradukcyi ab Biełarusi papoŭnicca jašče niekalkimi cikavymi vydańniami. U pryvatnaści, u Biełaruś źbirajecca anhlijski padarožnik Najdžeł Robierts. Jon płanuje vypuścić novy daviednik pa Biełarusi. Pieršaja redakcyja jaho daviednika pa Biełarusi vyjšła ŭ 2008 hodzie i karystałasia vialikaj papularnaściu siarod anhłamoŭnych turystaŭ.
