«Adčapiciesia ad Berana Trampa»: syn prezidenta ZŠA padvierhnuŭsia naśmieškam z-za niezvyčajnych pavodzin na inaŭhuracyi

Syn Donalda Trampa, 10-hadovy Beran padvierhnuŭsia naśmieškam u internecie z-za niezvyčajnych pavodzin na inaŭhuracyi baćki. Jaho nazyvali «vampiram», «frykam» i «Džofry Barateonam (majecca na ŭvazie admoŭny piersanaž «Hulni tronaŭ»). Inšyja karystalniki, nasuprać, zastupilisia za dzicia: dopis z zaklikam adčypicca ad jaho nabraŭ dva miljony łajkaŭ.

Na cyrymonii inaŭhuracyi Donalda Trampa jaho małodšy syn Beran pavodziŭ siabie niezvyčajna. 10-hadovy chłopčyk, jak šmatlikim zdałosia, nie moh zasiarodzicca, niedarečy uśmichaŭsia i admaŭlaŭsia pacisnuć ruku maci. U tvitary źjaviłasia šmat žartaŭ pra chłopčyka. Karystalniki pisali, što jon vyhladaje jašče bolšym frykam, čym jaho baćka, nazyvali vampiram z-za blednaści i paraŭnoŭvali z Džofry Barateonam z «Hulni tronaŭ». Inšyja śćviardžali, što jon vyhladaje tak, byccam stanie hvałtaŭnikom.

Scenarystka pieradačy Saturday Night Live Keci Ryč pažartavała pra chatniaje navučańnie Berana. Žart zvodziŭsia da taho, što raz Beran vučycca doma, to i šutynh jon ździejśnić doma — miełasia na ŭvazie, što chłopčyk padobny na ludziej, jakija rasstrelvajuć svaich adnakłaśnikaŭ u amierykanskich škołach. Za niaŭdały žart Ryč adchilili ad pracy na telekanale NBC, dzie vychodzić Saturday Night Live. Scenarystka vybačyłasia. Tvit Ryč nie byŭ źviazany z rečaisnaściu: syn Trampa chodzić u pryvatnuju škołu ŭ Ńju-Jorku.

Inšyja karystalniki stali na abaronu Berana Trampa. Dačka Biła Klintana Čełsi (baćka jakoj staŭ prezidentam, kali joj spoŭniłasia 12 hadoŭ) napisała, što ŭ Berana, jak i ŭsich dziaciej, jość prava być dziciem.

Samym papularnym dopisam u abaronu syna Donalda Trampa staŭ zapis amierykanki Mielisy Ernst.

«Niekatoryja ź libierałaŭ (u tym liku i znakamitaści), z adnaho boku, vystupajuć za mir, nadzieju i luboŭ, a z druhoha — kryvadušna siejuć nianaviść. Siońnia kali vy budziecie kłaści svaich dziaciej spać, pahladzicie im u vočy i spytajecie siabie: «Skazaŭ by ja heta svajmu dziciaci?»

Padabajecca vam ci nie padabajecca Tramp, heta ich dziesiacihadovy syn. Jon pakul raście, i słovy mohuć zakranuć jaho. Słovy ŭpłyvajuć na farmiravańnie dziciaci. Nivodnaje dzicia nie zasłuhoŭvaje, kab jamu takoje kazali.

Nie budźcie kryvadušnikami. Jaho zavuć Beran Tramp. Jon dzicia. Jaho treba pavažać. I adstać ad jaho», - napisała Mielisa Ernst. Jaje dopis łajknuli dva miljony razoŭ.

• 0
• 0
• 0
• 0
• 0
• 0
• 0
• 0