Prezident Kazachstana Nursułtan Nazarbajeŭ 25 studzienia vystupiŭ sa zvarotam pa pytańniach pieraraźmierkavańnia paŭnamoctvaŭ pamiž halinami ŭłady. Pres-słužba Akordy raspaŭsiudziła tekst vystupleńnia Nursułtana Nazarbajeva.
«Ja źviartajusia da vas pa pryncypovym dla našaj krainy pytańni - heta pieraraźmierkavańnie paŭnamoctvaŭ pamiž halinami dziaržaŭnaj ułady. Asnoŭnaja sutnaść - prezident addaje šerah svaich paŭnamoctvaŭ parłamientu i ŭradu», - padkreśliŭ u svaim zvarocie Nursułtan Nazarbajeŭ. Kiraŭnik Kazachstana adznačyŭ, što mocnaja prezidenckaja viertykal patrebna była krainie ŭ chodzie pieraadoleńnia ciažkaściej stanaŭleńnia dziaržavy. «Jana siabie ŭ toj čas apraŭdała. Ale reforma nacelena na pavyšeńnie efiektyŭnaści sistemy kiravańnia», - rastłumačyŭ jon.
Sutnaść prapanavanaj reformy - u značnym pieraraźmierkavańni paŭnamoctvaŭ, demakratyzacyi palityčnaj sistemy ŭ cełym. Dla prezidenta ŭ novych umovach pryjarytetami stanuć stratehičnyja funkcyi, rola viarchoŭnaha arbitra ŭ adnosinach pamiž halinami ŭłady. Kiraŭnik dziaržavy skancentrujecca taksama na źniešniaj palitycy, nacyjanalnaj biaśpiecy i abaranazdolnaści krainy. Pry hetym rola ŭrada i parłamienta značna ŭzmocnicca. «Heta rabota budzie pravodzicca pa dvuch klučavych napramkach. Pa-pieršaje, nieabchodna pieradać značnuju častku ŭstanoŭlenych zakonam paŭnamoctvaŭ prezidenta pa rehulavańni sacyjalna-ekanamičnych pracesaŭ uradu i inšym vykanaŭčym orhanam», - paviedamiŭ jon.
Pavodle słoŭ Nursułtana Nazarbajeva, druhaja, bolš składanaja zadača - zbałansavać adnosiny pamiž halinami ŭłady na kanstytucyjnym uzroŭni. «Važna ŭzmacnić rolu parłamienta ŭ farmiravańni ŭrada, pavysić adkaznaść kabinieta ministraŭ pierad deputackim korpusam. Atrymaŭšaja pieramohu na parłamienckich vybarach partyja budzie ŭpłyvać na farmiravańnie ŭrada. Zychodziačy z hetaha, budzie zakanamiernym, kali ŭrad stanie składać paŭnamoctvy pierad navavybranym mažylisam, a nie prezidentam, jak heta było raniej. Treba spraścić paradak vakazvańnia niedavierja členam urada z boku parłamienta. Heta ŭzmocnić kantrol zakanadaŭčaj haliny ŭłady za vykanaŭčaj», - padkreśliŭ jon.
Jak adznačyŭ Nursułtan Nazarbajeŭ, metazhodna było b pieradać uradu zaćviardžeńnie dziaržprahram, za jakija jon budzie nieści ŭsiu paŭnatu adkaznaści. Akramia taho, uradu možna pieradać prava ŭtvarać i kasavać centralnyja vykanaŭčyja orhany, što nie ŭvachodziać u jaho skład. Prezident moža admovicca ad prava admianiać abo prypyniać dziejańnie aktaŭ urada i premjer-ministra.
«Stracili aktualnaść normy ab mahčymaści pryniaćcia prezidenckich ukazaŭ, jakija majuć siłu zakona. Prapanujecca ŭzmacnić rolu parłamienta ŭ adnosinach da miascovaj vykanaŭčaj ułady. Akramia taho, treba prapracavać pytańnie ab udaskanaleńni dziejnaści Kanstytucyjnaha savieta, sudovaj sistemy i prakuratury. U toj ža čas nam nieabchodny biezumoŭnyja harantyi niaźmiennaści našaha kanstytucyjnaha ładu», - reziumavaŭ prezident.
Prajekt kanstytucyjnych reform u Kazachstanie budzie vyniesieny na ŭsienarodnaje abmierkavańnie.
