U prysutnaści prezidenta RF Uładzimira Pucina Leanid Rašetnikaŭ, jaki vyklikaŭ pratest biełaruskaha MZS vykazvańniami pra biełaruskuju movu, pieradaŭ paŭnamoctvy svajmu pierajemniku na pasadzie — byłomu premjer-ministru, a paśla — kiraŭniku Słužby zamiežnaj raźviedki Michaiłu Fradkovu.
«Chaču vam padziakavać za pracu, jakuju vy zrabili, kirujučy Rasijskim instytutam stratehičnych daśledvańniaŭ (RISD), niamała było zroblena, vielmi raźličvaju, što Michaił Jafimavič heta praciahnie», — skazaŭ Pucin Rašetnikavu, jak śviedčyć rolik, raźmieščany na aficyjnym akaŭncie RISD.
Kantrakt Rašetnikava na kiraŭnictva RISD skončyŭsia i nie budzie praciahnuty, bo pa zakonach RF kiraŭnik takich dziaržaŭnych instytutaŭ nie moža być starejšym za 70 hod, napisaŭ supracoŭnik instytuta Aleh Niemienski ŭ svaim błohu.
«Usie pieramieny naturalnyja i čakanyja, nijakich revalucyj u pracy instytuta niama», — piša Niemienski.
«Leanid Piatrovič pakidaje dobry kalektyŭ z dobrym imidžam i napracoŭkami, jaki hatovy adkazvać na zadačy, jakija vy stavicie», — adkazaŭ Pucinu Fradkoŭ.
«Vosiem hod my jak mahli pracavali, realizujučy vašuju liniju ŭ zamiežnaj palitycy… Upeŭnieny, što kalektyŭ razam ź Michałam Jafimavičam budzie hetak ža paśpiachova realizoŭvać hetuju liniju», — skazaŭ Rašetnikaŭ Pucinu.
U śniežni Rašetnikaŭ, były hienierał rasijskaj raźviedki, zajaviŭ, što Biełaruś — štučnaja kraina, a biełaruskaja mova — štučnaja mova, stvoranaja balšavikami. Hetyja zajavy vyklikali rezka admoŭnuju reakcyju biełaruskaha hramadstva i Ministersva zamiežnych spraŭ Biełarusi.
Fradkoŭ u 2004—2007 hadach byŭ premjer-ministram Rasii, u 2007—2016 uznačalvaŭ Słužbu zamiežnaj raźviedki RF.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary