Śledčy kamitet Rasii vyklikaje biełaruskaha fatohrafa Vasiukoviča na dopyt
1 lutaha biełaruski fatohraf Alaksandr Vasiukovič atrymaŭ na elektronnuju poštu list sa Śledčaha kamiteta Maskvy. U im śledčy A. Marazienka zaprašaje Vasiukoviča na hutarku dla atrymańnia piśmovych tłumačeńniaŭ pa materyjałach pravierki, papiarednie ŭzhadniŭšy datu i čas sa śledčym.
Ź lista taksama zrazumieła, što pravierka pravodzicca pa skarzie adnaho z deputataŭ maskoŭskaj municypalnaj akruhi Jakimanka — Zacharava D. A. Deputat miarkuje, što ŭ vystavie Vasiukoviča, jakaja prajšła ŭ Maskvie ŭ minułym hodzie, jość «prapahanda zabaronienaj u Rasii arhanizacyi «Pravy siektar».
«List ja atrymaŭ tolki što na elektronnuju poštu. Dumaju, usio heta z toj samaj sieryi, što i źniščeńnie vystavy. Na razmovu da śledčaha ŭ Maskvu nie pajedu. Dašlu im adkaz, napišu, što žyvu ŭ Biełarusi, a nie ŭ Rasii. Na maich zdymkach niama ŭdzielnikaŭ «Pravaha siektara», — raskazaŭ Alaksandr Vasiukovič u razmovie ź Jeŭraradyjo.
28 vieraśnia ŭ Maskvie ŭ Centry dakumientalnaj fatahrafii FOTODOC prachodziła tvorčaja sustreča ź biełaruskim fatohrafam Alaksandram Vasiukovičam. Vasiukovič zaniaŭ pieršaje miesca ŭ naminacyi «Kanflikt» na mižnarodnym fotakonkursie «Pramy pohlad 2016». Tut ža možna było ŭbačyć jaho fotazdymki, na jakich adlustravanyja adzinočnyja i hrupavyja partrety udzielnikaŭ dobraachvotnaha bataljona «Danbas», zroblenyja Vasiukovičam padčas pajezdki na front letam 2014 hoda. Praź niejki čas Vasiukovič iznoŭ źviazaŭsia z hierojami svaich fota, kab daviedacca pra ich los. Na fotazdymkach svajho prajekta jon koratka paznačyŭ, chto z sałdataŭ zastaŭsia žyć, chto byŭ paranieny, trapiŭ u pałon albo zahinuŭ.
Padčas tvorčaj sustrečy ŭ zału pryjšoŭ maskoŭski mastak Anton Bielikaŭ i pačaŭ zamaloŭvać zdymki Vasiukoviča farbaj z bałončyka. «Vy — ścipły fašyst! Ja pahardžaju vami… Što vy robicie? Heta ž zabojcy! Jany zabivali žančyn i dziaciej. A vy pryjazdžajecie ŭ Maskvu i viešajecie ich fota tut! Vy — uśmiešlivy hadzionyš. Jak vam nie soramna?» — havaryŭ Bielikaŭ Vasiukoviču.
Praces źniščeńnia vystavy biełaruskaha fatohrafa zdymaŭ kanał «Rien-TV». Jašče praź dzień vystava biełarusa była kančatkova źniščanaja ludźmi, jakija nazvalisia pradstaŭnikami kazactva.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary