«Raniejšaja damova MZS Polščy i Polskaj televizii nakont stvareńnia «Biełsata» ŭžo skasavanaja» — napisaŭ u artykule dla haziety Rzeczpospolita dziaržsakratar u spravach biaśpieki, uschodniaj i jeŭrapiejskaj palityki MZS Polščy Marek Ziułkoŭski.
«My achvotna raspačniom z daśviedčanaj biełaruskaj kamandaj «Biełsata» dyskusiju, jak źmianić hety ŚMI, kab jon moh znajści patrebnaha sponsara i prestyž važnaha srodku biełaruskaj kamunikacyi» — napisaŭ vysokapastaŭleny čynoŭnik MZS u artykule «MZS hladzić na ŭschod. Karpatlivaja narmalizacyja dačynieńniaŭ ź Biełaruśsiu».
Marek Ziułkoŭski maje pasadu, roŭnuju namieśniku ministra zamiežnych spraŭ, jon adkazvaje ŭ viedamstvie za ŭschodniuju palityku Polščy.
Jak daviedałasia Svaboda ź nieaficyjnych krynicaŭ, polskaje MZS całkam spyniaje finansavańnie Biełsata.
U dadzieny momant Biełsat časova finansuje Polskaja hramadskaja televizija TVP, častkaj jakoj kanał i źjaŭlajecca.
5 studzienia dyrektarka tielekanała Ahnieška Ramašeŭskaja sustrełasia z premjer-ministram Polščy Bieataj Šydła i paviedamiła na svaim profili ŭ Fejsbuku nastupnaje:
«Dumaju, što budziecie zadavolenyja, jak i ja, navinoju, jakuju ja pieradaju: pani premjer zapeŭniła mianie i ŭpaŭnavažyła zajavić, što isnavańniu Biełsata ničoha nie pahražaje. Najbližejšy miesiac my pryśviacim abmierkavańniu dalejšych pryncypaŭ supracoŭnictva z MZS».
Pavodle MZS Polščy, ad 2007 hoda ahułam finansavańnie telekanała Biełsat skłała 157 młn złotych (za hety čas kurs złotaha vahaŭsia ad 2 da 4 za dalar ZŠA). Heta tracina ŭsich srodkaŭ, jakija Polšča vydatkavała za hety čas na padtrymku demakratyi ŭ Biełarusi.
25 studzienia dziaržsakratar MZS Polščy Marek Ziułkoŭski sustreŭsia z ambasadaram Biełarusi ŭ Varšavie Alaksandram Aviarjanavym. U polski parłamient ciapier pryjechała ź vizitam delehacyja Pałaty pradstaŭnikoŭ Biełarusi. Polski vizit — pieršy ŭ historyi Pałaty pradstaŭnikoŭ— praciahniecca da 2 lutaha.
Kamientary