Alaksandr Łukašenka ličyć, što asudžany biźniesmien Alaksandr Muraŭjoŭ «chacieŭ zmachlavać» u pytańni azdaraŭleńnia pieradadzienaha jamu ŭ kiravańnie dziaržaŭnaha pradpryjemstva «Motavieła».
«Na ŭzroŭni ž prezidenta pytańnie vyrašałasia, jon ža da mianie prypoŭz. I ja jamu zabiaśpiečyŭ ŭsio — ad dachu da padtrymki samaj realnaj», — skazaŭ Łukašenka 3 lutaha na sustrečy z pradstaŭnikami ŚMI i ekśpiertami.
«I jon (Muraŭjoŭ) pačaŭ žulničać. Paabiacaŭ 20 miljonaŭ ukłaści, stvaryć najpryhažejšaje pradpryjemstva. A što takoje viełasipied dla naroda, zrazumieła, i ja z hetaha zychodziŭ. Jon skazaŭ: «20 miljonaŭ układu, fiederacyju ŭznačalu (viełasipiednaha sportu) i inšaje. Dobra. «Voś, ja heta zrablu». Dobra. Ale maj na ŭvazie — adkažaš. Ja ščyra vam skažu, ja jamu tady tak skazaŭ: nie zrobiš — siadzieš u turmu. Jon zaśmiajaŭsia: «Nu što vy, Alaksandr Ryhoravič, škłozavod «Jalizava», kolki ja tam byŭ, kolki ja im dapamahaŭ? Dvaccać miljonaŭ ŭkładu». Što jon pačaŭ rabić? «Ja jak by ŭkłaŭ praź niejkija tam firmački, pasiarednikaŭ i hetak dalej». Dumaŭ: maŭlaŭ, ja aŭstryjec, značyć usio mahčyma, i Łukašenka baicca ab inviestycyjach i ničoha ź im nie zrobić», — adznačyŭ kiraŭnik dziaržavy.
«Nu, urešcie, my hladzieli-hladzieli za hetym pradpryjemstvam i jon užo pryjšoŭ da staršyni Minharvykankama (na toj momant heta byŭ Mikałaj Ładućka) z prapanovaj pradać hetyja ziemli, tamu što niepierśpiektyŭnyja ŭ raźvićci viełasipiednaj vytvorčaści. Ładućka da mianie — i pačynaje jaho padtrymlivać. I kali ŭsio ruchnuła, ja Ładućku tudy adpraviŭ hienieralnym dyrektaram. Voś toje, što vy nie viedajecie, voś tak heta było pa-čałaviečy», — skazaŭ Łukašenka.
«Ja nie byŭ prychilnikam, kab jaho pasadzili, — padkreśliŭ jon. — Ale ja jamu nahadaŭ, što ja jamu kazaŭ, i druhoje: kali tolki ŭ ciabie znojduć parušeńni zakona i machlarstva — ja ciabie abaraniać nie budu. Jon siadzić. Usio było prosta: ty ŭlez na ŭzrovień prezidenta, abiacaŭ — vykonvaj. Dzieści nie atrymałasia — nie chłusi, heta ž prezident, u nas ža dyktatura. Dyk ty ž bojsia hetaj dyktatury».
U žniŭni 2007 hoda Biełaruś pradała 99,72% statutnaha fondu AAT «Motavieła» kampanii ATEC Holding GmbH, jakaja naležyć Muraŭjovu i zarehistravanaja ŭ Aŭstryi. Adnak praź piać hadoŭ, u vieraśni 2013-ha, Alaksandr Łukašenka naviedaŭ «Motavieła», zastaŭsia niezadavoleny jaho pracaj i zapatrabavaŭ biezumoŭnaha vykanańnia płanaŭ pa jaho raźvićci. Łukašenka tady nahadaŭ, što adnym z najbolš važnych umoŭ prodažu «Motavieła» było zachavańnie jaho śpiecyjalizacyi i ŭkładańnie ŭ 2007—2012 hadach u raźvićcio vytvorčaści nie mienš za 20 młn dołaraŭ, adnak pastaŭlenyja ŭmovy byli vykananyja tolki častkova. Kiraŭnik dziaržavy taksama zastaŭsia niezadavoleny tym, što nie ŭsia terytoryja pradpryjemstva zadziejničana pad vytvorčaść, jak było ahavorana, kala čverci płoščaŭ zdavalisia ŭ arendu.
U červieni 2015 hoda Muraŭjoŭ byŭ zatrymany. Pytańni ŭ śledstva byli nie tolki da pracy «Motavieła», ale i škłozavodaŭ ŭ Jalizava i Homieli, stvoranych z udziełam ATIES Holding GmbN. Škłozavod «Jalizava» byŭ pryznany bankrutam. 30 studzienia hetaha hoda Alaksandr Muraŭjoŭ prysudžany da 11 hadoŭ pazbaŭleńnia voli. Pa rašeńni suda dziaržavie adychodziać usie akcyi AAT «Motavieła», jakija naležać Muraŭjovu.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary