Łukašenka: Rasija dušyć ekanomiku Biełarusi praz pradpryjemstvy

Mnostva pretenzij da rasijskaha kiraŭnictva vykazaŭ Alaksandr Łukašenka 3 lutaha na sustrečy z pradstaŭnikami ŚMI i ekśpiertami, adkazvajučy na pytańnie ab ekanamičnaj intehracyi i intehracyjnych inicyjatyvach jak u miežach Sajuznaj dziaržavy, tak i Jeŭrazijskaha ekanamičnaha sajuza. Pry hetym jon adšturchnuŭsia ad tezisa, što «ekanomika Biełarusi — heta finišnaja vytvorčaść Savieckaha Sajuza», i nieabchodnaści ciesnych kaapieracyjnych suviaziaŭ z Rasijaj.

Pavodle słoŭ Łukašenki, jon prapanoŭvaŭ rasijskamu boku «bierahčy lepšyja pradpryjemstvy», nie stvarać «alternatyŭnyja pradpryjemstvy» ŭ Rasii. «Dziakuj bohu, nie stvarajuć, heta nie tak prosta», — dadaŭ biełaruski kiraŭnik. Rabić heta niama čaho, upeŭnieny jon.

U jakaści prykładu Łukašenka pryvioŭ AAT «BiełAZ», pradukcyja jakoha «ŭsich zadavalniaje». «Tym bolš što ŭ BiełAZie 60% rasijskaha, u MTZ — bolš za 65% rasijskich kamplektujučych», — skazaŭ jon.

Pavodle słoŭ kiraŭnika dziaržavy, biełaruskija pradpryjemstvy supracoŭničajuć z rasijskimi, dzie pracuje bolš za 10 miljonaŭ čałaviek.

«Tak čyja ŭ Biełarusi ekanomika? Rasijskaja u tym liku. Ja časta Pucinu kažu, słuchaj, kali laśnie naša ekanomika, nu jak minimum 10 miljonaŭ prablem źjavicca ŭ ciabie i ŭ pradpryjemstvaŭ. Tak dapamahać, kali my adzinyja, choć by kredytami, ja nie kažu subsidavać. Kredyt dać hetym pradpryjemstvam, kab jany pracavali», — ličyć Łukašenka.

Na samaj spravie, jak zajaviŭ biełaruski kiraŭnik, adbyvajecca «ŭdušeńnie ekanomiki praz pradpryjemstvy». U jakaści prykładu jon pryvioŭ Minski aŭtamabilny zavod i KamAZ, a ličby začytaŭ vice-premjer Uładzimir Siamaška. Pavodle jaho infarmacyi, MAZ płacić za 1 tys. kubamietraŭ hazu 278,6 dołara, KamAZ — 65; za elektraenierhiju: MAZ — 11,7 centa za 1 kVt•hadz, KamAZ — 2,8. «A dadajcie da hetaha subsidavańnie ź biudžetu. Heta roŭnyja ŭmovy?» — aburany Łukašenka.

Nastupnyja prykłady, pavodle słoŭ prezidenta, heta žadańnie Rasii «amal biaspłatna» nabyć «Intehrał», MZKC, «Pielenh», «Hrodna-Azot» i dałučyć MAZ da KamAZa. Pry hetym, jak adznačyŭ Łukašenka, rasijski bok nie daje harantyj, što ŭ ich raźvićcio buduć układzienyja srodki, zabiaśpiečana pavieličeńnie pastupleńniaŭ u biudžet, zachavanyja pracoŭnyja kalektyvy i zarpłata, pad pradukcyju majucca novyja rynki. «Dyk navošta mnie tady z vami mieć spravu? Kryŭda (z rasijskaha boku)», — kanstatavaŭ kiraŭnik dziaržavy.

«I ja dumaju, u mianie prosiać za biaspłatna addać vysokatechnałahičnyja pradpryjemstva. Heta pa-bratersku? Heta prystojna?» — ździŭlajecca Łukašenka.

Zakranajučy MAZ i KamAZ, jon adznačyŭ, što nie suprać kaapieracyi. «Košt? Hatovyja pradać za biascenak. Abjadnać. Ale ja bajusia, kab z MAZa majho… jon nie pieratvaryŭsia ŭ niejki cech, dzie buduć hajki rabić. Ale my hetuju haječnuju vytvorčaść na MAZie ŭžo prajšli», — zajaviŭ Łukašenka.

«Tak my i nie addali hetyja pradpryjemstvy, — praciahnuŭ jon. — Nu voś, treba rachunki źvieści. Nie atrymajecca. Ja nie chaču nahniatać abstanoŭku, ale vy pavinny razumieć: my vyžyviem. Ja ŭ hetym prosta ŭpeŭnieny. Ale kali my razydziemsia, kali pamiž nami ŭtvorycca biezdań, jaje potym zasypać, vyraŭnavać — syduć dziesiacihodździ».

Jašče adzin prykład staŭleńnia Rasii da biełaruskaj ekanomiki datyčyŭsia adnoŭlenaha i madernizavanaha minskaha AAT «Kamvol», jakoje vyrablała tkaniny dla siłavych struktur RF i svabodna kankuravała. «Ciapier rasijski ŭrad prymaje rašeńnie: biełaruskija tkaniny — zamiežnyja. Heta značyć, nas faktyčna vykinuli z rynku», — kanstatavaŭ Łukašenka.

«Vy nie možacie kankuravać — vy nas vykidajecie z rynku, pryčym nachabna, parušajučy ŭsie mižuradavyja pahadnieńni. My źviarnulisia ŭ Jeŭrazijskuju ekanamičnuju kamisiju. Jany (urad RF) prosta admachnulisia ad hetaj kamisii. Voś tak jany vykonvajuć abaviazacielstvy», — sa škadavańniem skazaŭ Łukašenka. Takich prykładaŭ, pavodle jaho słoŭ, možna pryvieści niamała.

«Vy vajujecie sa svaim narodam, — zajaviŭ kiraŭnik biełaruskaj dziaržavy, źviartajučysia, vidać, da kiraŭnictva Rasii. — Navošta vy heta robicie, nam dahetul nie zrazumieła».

Łukašenka ŭpeŭnieny, što rasijskaje kiraŭnictva chavaje ad nasielnictva infarmacyju pra toje, što adbyvajecca ŭ Biełarusi. «Cytuju adnaho vialikaha čałavieka ŭ Rasii. Kali ja jamu zadaŭ pytańnie: «Navošta vy heta robicie?» — jon kruciŭsia, kruciŭsia i kaža: «Alaksandr Ryhoravič, zanadta vysoki hradus Biełarusi i vas asabista ŭ Rasii i ŭ rehijonach taksama. Treba troški apuścić». «Heta niapravilna, — upeŭnieny biełaruski kiraŭnik. — Ja nie pretenduju ni na što rasijskaje. I heta niemahčyma», — kanstatavaŭ Łukašenka.

• 0
• 0
• 0
• 0
• 0
• 0
• 0
• 0