Łukašenka: Nivodny čynoŭnik nie moža ŭziać kredyt pad katedž pad 3% hadavych biez majho viedama

«Ni adzin čynoŭnik nie moža ŭziać kredyt na budaŭnictva katedža pad 3% hadavych biez majho viedama», — zajaviŭ Alaksandr Łukašenka 3 lutaha na sustrečy z pradstaŭnikami hramadskaści i ŚMI, adkazvajučy na zaŭvahu hałoŭnaha redaktara haziety «Narodnaja vola» Iosifa Siaredziča.

Pavodle infarmacyi Siaredziča, «adzin z vysokapastaŭlenych čynoŭnikaŭ, susied prezidenta pa Drazdach, uziaŭ kredyt pad 3% hadavych dla budaŭnictva katedža».

«Pa-pieršaje, heta nie moj susied. Ja ŭžo nie žyvu ŭ Drazdach, a ŭ vioscy za 30 kiłamietraŭ, užo dziesiać hadoŭ. Pa-druhoje — pra niedachop infarmacyi: ja i sam nie viedaju, pad jaki pracent niechta atrymaŭ kredyt», — pryznaŭsia prezident.

Jon pacikaviŭsia, jaki ŭ krainie samy lhotny kredyt. Na heta dziaržsakratar Savieta biaśpieki Biełarusi Stanisłaŭ Zaś paviedamiŭ, što čynoŭniki atrymlivajuć kredyty pad 16% hadavych, i abvierh infarmacyju ab 3%.

«Ja abaviazkova hetym pacikaŭlusia», — paabiacaŭ Łukašenka. Na hatoŭnaść Siaredziča nazvać zhadanaha čynoŭnika Łukašenka zapiarečyŭ: «Nie treba. Treba pavažać i čynoŭnikaŭ. Kali heta jość, my znojdziem jaho chutka».

Kiraŭnik dziaržavy nahadaŭ, što takija kredyty davalisia pry budaŭnictvie ŭ ahraharadkach, sielskaj miascovaści, šmatdzietnym siemjam. «Ja nie viedaju, ci maje prava bank davać taki lhotny kredyt čynoŭniku. Ale ni adzin čynoŭnik biez majho viedama nie advažyŭsia b pajści ŭ bank i ŭziać taki kredyt, tamu ja jaho adrazu ž uziaŭ by za vušy i advioŭ, viedaješ kudy. Kali heta zroblena, heta ŭžo nieprystojna pastupiŭ čynoŭnik», — dadaŭ Łukašenka. Jon taksama zaŭvažyŭ, što zakonam lhotnyja kredyty nie zabaronienyja, i heta sprava banka, jaki «z hłuzdu źjechaŭ i daŭ takija hrošy pad hety pracent». «Kali bank na takija vydatki pajšoŭ, z čaho b heta? Šmat pytańniaŭ», — adznačyŭ kiraŭnik dziaržavy.

Łukašenka zajaviŭ, što moh by dazvolić vydaču lhotnaha kredytu dla čynoŭnika, kali toj maje značeńnie dla ŭłady. «Čynoŭniki — nie sabaki, i nie svołačy. A ŭ nas pryniata — takija siakija … Tak, jość ludzi admarožanyja, adarvanyja, ale jość i tyja, chto robić niamała, i jakim my b pad 1% davali. Kali b u mianie pryjechaŭ u Minsk dobry mocny dziaržsłužačy, ja b moh dać jamu pad 3% kredyt. Ale ja nie davaŭ, nie pamiataju, kab takoje rašeńnie prymaŭ», — padkreśliŭ Łukašenka.

Prezident taksama raspavioŭ pra vydzialeńnie ŭčastkaŭ dla čynoŭnikaŭ u Drazdach. «Buduj dom, ale ja tabie dazvoliŭ hety kavałak ziamli, ty pavinien całkam pakazać, adkul ty ŭziaŭ hrošy. Pradajem kvateru ŭ horadzie, pradajem hetaje i toje, a na astatniuju častku biarem kredyt. Biary, ale pakazvaj, kab usio było vidać», — rastłumačyŭ Łukašenka. Na jaho dumku, čynoŭniki zasłužyli, i «dziaŭbać ich, što jany žuliki, a potym ad ich niešta patrabavać nielha». «Jany adkazvajuć za dziaržavu», — padkreśliŭ biełaruski kiraŭnik.

• 0
• 0
• 0
• 0
• 0
• 0
• 0
• 0