Na sustrečy z pradstaŭnikami ŚMI i hramadskaści 3 lutaha Alaksandr Łukašenka prakamientavaŭ zdahadki ab tym, što Rasija źbirajecca akupiravać Biełaruś.
«Kali niechta dumaje, što ŭžo niekalki tysiač vahonaŭ zahruzili i nas akupirujuć, Rasija ŭvodzić siudy svaje vojski, — nie budźcie vy naiŭnymi. Što, Rasija naohuł užo z hłuzdu źjechała i nie ŭmieje vajavać? Jak ža možna vajavać na čyhunačnych płatformach? Toje, što buduć vojski siudy ŭviedzienyja, to roŭnieńka jany adsiul i pojduć. Siońnia navat nie ahavorvajecca takaja situacyja. Vojski vysadziać niedzie kala palihona, razabjuć łahier (u ramkach vučeńniaŭ «Zachad-2017»), tam budzie mizer bajavych prypasaŭ — tolki kab adstrelić pa mišeniach, astatniaje — chałastyja bojeprypasy. Usio pad kantrolem», — zapeŭniŭ Łukašenka.
Jon adznačyŭ, što prapanavaŭ Uładzimiru Pucinu pravodzić sumiesnyja vajennyja vučeńni raz na dva hady — pa čarzie ŭ Rasii i Biełarusi. «Nadyšoŭ naš čas, i my prymiem hetyja vučeńni. Heta buduć adkrytyja vučeńni, my zaprosim usich», — padkreśliŭ prezident.
Havoračy ab stvareńni ŭ Biełarusi rasijskaj avijacyjnaj vajennaj bazy, Łukašenka adznačyŭ, što nie bačyć u hetym nieabchodnaści. «Dy kińcie vy. Kamu patrebnyja hetyja 10 samalotaŭ, jakija Rasija chacieła pasadzić u Babrujsku? Ja Pucinu kažu: treba adnaŭlać hety aeradrom, tam užo ŭźlotna-pasadačnuju pałasu napałovu razabrali, navošta 10 samalotaŭ? Vy dajcie mnie 20 samalotaŭ, u nas vydatnyja piłoty, vydatnaja škoła. Vy viedajecie, što my vajujem nie horš na vajennych samalotach, vy nam dajcie 20 samalotaŭ, my ž adzinaja hrupoŭka. Nie», — skazaŭ kiraŭnik dziaržavy.
Pavodle słoŭ Łukašenki, u sučasnaj vajnie samalot zdolny vieści 10 chvilin boju. «Jon uźlacieŭ, i jaho niama. Vajna siońnia inšaja. Heta ŭ Siryi možna lotać, kali niama sistemy SPA. U nas navat u Biełarusi: ty ŭźlacieŭ dzieści za 200 kiłamietraŭ, my ciabie bačym, i tvajo žyćcio skončanaje. I potym, što takoje aeradrom na piarednim krai teatra vajennych dziejańniaŭ? Nie daj Boh vajna, dźvie rakiety na ŭźlotna-pasadačnaj pałasie — ni adzin samalot nie ŭźlacić. Navošta ich siudy?» — skazaŭ jon.
Čas padlotu samalotaŭ sa Smalenska — čatyry chviliny, dadaŭ Łukašenka. Pavodle jaho słoŭ, i Uładzimir Pucin padčas abmierkavańnia hetaha pytańnia pahadziŭsia z tym, što rasijskaja baza ŭ Biełarusi nie patrebnaja. «Navošta tady pierad prezidenckimi vybarami, kali byccam by niejkija ruchi z Zachadam pajšli, my bazu tut chočam? Dyk nie bazu, a 10 ci 20 samalotaŭ pasadzić chacieli — heta demanstracyja. Jana nam patrebna, hetaja demanstracyja? Nie. U nas svaich chapaje takich samalotaŭ, ale kali jašče 20 vy siudy pierakiniecie, niama pytańniaŭ», — adznačyŭ Łukašenka.
Jon taksama raskazaŭ, što napiaredadni čempijanatu śvietu pa chakiei ŭ 2014 hodzie Biełaruś prapanavała Rasii nakiravać siudy źviano źniščalnikaŭ dla sumiesnaha zabieśpiačeńnia biaśpieki. «Jany pierahnali čatyry samaloty ŭ Baranavičy, rasijanie ŭ Biełarusi adpracavali. Ja dumaŭ: adpracavali, i dobra, pakinuć hetyja samaloty. Nie, zabrali, davaj bazu. Navošta? Usio ŭžo adpracavana, usio narmalna z punktu hledžańnia vajennych, niachaj słužać dalej — ruski čałaviek i biełarus u adnym samalocie. Nie, zabrali — davaj bazu», — skazaŭ kiraŭnik dziaržavy. Hetaja prapanova była nie vajennaj, ličyć jon.
