Kreml: Za 4 hady straty rasijskaha biudžetu ad biaspošlinnaj pastaŭki nafty ŭ Biełaruś skłali $22,3 młrd

U Kramli padličyli, što tolki za čatyry hady straty rasijskaha biudžetu ad biaspošlinnaj pastaŭki nafty ŭ Biełaruś skłali 22,3 młrd dalaraŭ.

«Z 2011 pa 2015 hady biaspošlinna štohod pastaŭlałasia 18—23 młn ton nafty biełaruskim partnioram. Usiaho za hety pieryjad rasijski biudžet niedaatrymaŭ 22,3 młrd dołaraŭ. Usio heta źjaŭlajecca nie čym inšym, jak prostaj i ŭskosnaj padtrymkaj sajuznaj biełaruskaj dziaržavy», — cytuje TASS paviedamleńnie pres-słužby prezidenta RF.

U Kramli taksama adznačajuć, što Biełarusi vydzielena zvyš 6 młrd dołaraŭ kredytaŭ pa roznych tranšach, i «hetaja nahruzka lehła dadatkovym ciažaram na biudžet Rasijskaj Fiederacyi». Akramia taho, 2,5 młrd dołaraŭ roznymi tranšami Minsk atrymaŭ u vyhladzie kredytaŭ pa linii Jeŭrazijskaj fondu stabilizacyi i raźvićcia.

«Rasija akazvała i praciahvaje akazvać maštabnuju ekanamičnuju, palityčnuju i inšuju dapamohu Biełarusi, zychodziačy z asablivaha sajuźnickaha charaktaru adnosin dźviuch krain», — havorycca ŭ paviedamleńni.

«Što da ekanamičnych i kamiercyjnych sprečnych pytańniaŭ, jakija ŭźnikajuć u haspadarčaj dziejnaści, to jany pavinny vyrašacca ŭ spakojnaj maniery, šlacham dziełavych pieramoŭ. Maskva raźličvaje, što nabor roznahałośsiaŭ, jaki ciapier fihuruje ŭ dvuchbakovym paradku dnia, budzie ŭrehulavany padčas takich pieramovaŭ», — adznačajuć u Kramli.

Pry hetym u paviedamleńni padkreślivajecca «pryjarytet praciahu intehracyjnych pracesaŭ»: «Maskva nadaje hetamu pieršačarhovaje značeńnie, ź vialikaj uvahaj stavicca da dalejšaha raźvićcia Sajuznaj dziaržavy Rasii i Biełarusi».

Paviedamleńnie pres-słužby Kramla źjaviłasia praź niekalki hadzin paśla zajaŭ pra biełaruska-rasijskija adnosiny, zroblenych Alaksandram Łukašenkam 3 lutaha na sustrečy z pradstaŭnikami hramadskaści i ŚMI ŭ Minsku.

Pavodle słoŭ Łukašenki, ustupajučy ŭ intehracyjnyja abjadnańni z Rasijaj, Biełaruś raźličvała, što jany buduć hruntavacca «na raŭnapraŭi, što buduć roŭnyja ŭmovy». «Heta hałoŭnaje, biez hetaha nie moža być sajuzaŭ. Kali ich niama, navošta tudy iści?» — skazaŭ jon.

Biełaruski kiraŭnik zajaviŭ, što z-za niaroŭnych cen i ŭmoŭ u miežach Mytnaha sajuza Biełaruś straciła «tolki z-za cenavaha faktaru 15 miljardaŭ dołaraŭ». «Jany pryznajuć hetuju ličbu. I voś jany nam dali až 5 miljardaŭ kredytaŭ!.. Heta dobra, zabrać u nas 15 miljardaŭ praz ceny i potym nam ža dać našy ž hrošy, i to tolki treciuju častku pad pracent u try razy bolšy, čym MVF. Vorahi… Heta narmalna? I ŭśled — my kormim ich, hiry na nahach, takija-siakija», — adznačyŭ Łukašenka.

Takuju situacyju jon ličyć «nienarmalnaj». «Heta treba zakančvać, na hetym šmat nie atrymaješ. I my nie Ukraina. My — nie antyrasijskija, my nie imkniemsia ŭ NATA. My śviata bieražem našy damoŭlenaści ab abaronie našaj prastory, našaj baćkaŭščyny Biełarusi i Rasii», — dadaŭ Łukašenka.

Pavodle jaho słoŭ, jon chacieŭ by, kab «kanflikt naviersie ni ŭ jakim razie nie apuściŭsia danizu». «Tamu vielmi prašu, nikoli nie kryŭdzicie rasijan. Jany da nas pryjazdžajuć, adpačyvajuć, nie biaspłatna heta robiać. Heta našy ludzi. Prezidenty — Łukašenka, Pucin — prychodziać i sychodziać, a narody zastajucca. Heta hałoŭnaje. Rana ci pozna my ŭsio roŭna damovimsia», — skazaŭ Łukašenka.

• 0
• 0
• 0
• 0
• 0
• 0
• 0
• 0