Rasija z 6 lutaha abmiažuje pastaŭki jałavičyny i jałavičnych subpraduktaŭ ź Minskaj vobłaści Biełarusi, havorycca ŭ paviedamleńni na sajcie Raśsielhasnahladu.
«Farmalnaje staŭleńnie z boku vieterynarnych śpiecyjalistaŭ abłasnych i rajonnych vieterynarnych słužbaŭ Respubliki Biełaruś da ažyćciaŭleńnia kantrolu za adhružanaj pradukcyjaj i adsutnaść sistemy nahladu ŭ Respublicy Biełaruś pryvodziać da praciahu sprobaŭ lehalizacyi i nastupnaha ŭvozu na terytoryju Rasijskaj Fiederacyi miasnoj syraviny nieviadomaha pachodžańnia niadobrasumlennymi biełaruskimi vytvorcami», — padkreślivaje Raśsielhasnahlad.
Pry praviadzieńni vieterynarnaha kantrolu biełaruskaj pradukcyi Raśsielhasnahladam «pastajanna fiksujucca ślady paŭtornaj pieraŭpakoŭki i ślady pieršasnaj markiroŭki (pieramarkiroŭki tavaraŭ), a taksama ślady zrezaŭ vieterynarnych klejmaŭ».
«Hetyja vypadki paćviardžajuć najaŭnaść na terytoryi Minskaj vobłaści Biełarusi ašukanskich schiem z pastaŭkami ŭ Rasiju ŭkrainskaj i jeŭrapiejskaj miasnoj syraviny, jakaja vydajecca za biełaruskuju. Adsutnaść dziejsnych mier pa niedapuščeńni pastavak u Rasijskuju Fiederacyju padkantrolnych tavaraŭ z parušeńniem vieterynarna-sanitarnych patrabavańniaŭ i norm JEAES i Rasijskaj Fiederacyi, a taksama materyjałaŭ rasśledavańniaŭ pa ŭstanaŭleńniu pryčyn, pa kožnym fakcie parušeńniaŭ vyklikaje niedavier da pracy dziaržaŭnaj vieterynarnaj słužby Minskaj vobłaści. U suviazi z hetym Raśsielhasnahlad vymušany ŭvieści časovyja abmiežavańni na pastaŭki ŭ Rasijskuju Fiederacyju jałavičyny i jałavičnych subpraduktaŭ z usich pradpryjemstvaŭ Minskaj vobłaści Respubliki Biełaruś z 06.02.2017 hoda», — padkreślivaje Raśsielhasnahlad.
Ab uviadzieńni časovych abmiežavańniaŭ taksama paviedamiŭ RBK kiraŭnik Raśsielhasnahladu Siarhiej Dankviert, u dačynieńni da jakoha Alaksandr Łukašenka 3 lutaha daručyŭ MUS Biełarusi razhledzieć mahčymaść zaviadzieńnia kryminalnaj spravy.
U śniežni 2016 hoda Raśsielhasnahlad pastaviŭ pad sumnieŭ «praŭdzivaść biełaruskaha pachodžańnia» pradukcyi STAA «Ryhor i syny», i prapanavaŭ biełaruskamu boku pravieści sumiesnuju pravierku pradpryjemstva.
Akramia taho, jak raspavioŭ RBK Dankviert, u chodzie praviedzienaj u piatnicu, 3 lutaha, videakanfierencyi pamiž Raśsielhasnahladam i departamientam vieterynarnaha i charčovaha nahladu Minsielhascharča Biełarusi było ŭstanoŭlena, što na hetym pradpryjemstvie vyjaŭleny «hrubyja parušeńni vieterynarnych praviłaŭ i jano ŭ ciapierašni čas nie ažyćciaŭlaje vytvorčuju dziejnaść». Takoje staŭleńnie z boku biełaruskich vieterynarnych śpiecyjalistaŭ Dankviert ličyć «farmalnym». «Jany pryvodziać da praciahu sprobaŭ lehalizacyi i nastupnaha ŭvozu na terytoryju Rasii miasnoj syraviny nieviadomaha pachodžańnia niadobrasumlennymi biełaruskimi vytvorcami», — adznačyŭ kiraŭnik Raśsielhasnahladu.
«Usie vyjaŭlenyja vypadki (akramia «Ryhor i syny» ŭ śniežni byli spynienyja pastaŭki z ASP «Vytvorčy kambinat», TAA «Aneksimprod», TAA «Tieramit») paćviardžajuć najaŭnaść na terytoryi Minskaj vobłaści Biełarusi ašukanskich schiem z pastaŭkami ŭ Rasiju ŭkrainskaj i jeŭrapiejskaj miasnoj syraviny, jakaja vydajecca za biełaruskuju», — ličyć Dankviert.
Pa jaho słovach, adsutnaść dziejsnych mier pa niedapuščeńni pastavak u Rasiju padkantrolnych tavaraŭ z parušeńniem vieterynarna-sanitarnych patrabavańniaŭ i normaŭ vyklikaje ŭ rasiejskaha boku «niedavier da pracy dziaržaŭnaj vieterynarnaj słužby Minskaj vobłaści».
KDB aktyŭna viarbuje palitviaźniaŭ, vyzvalenych pa pamiłavańni — pravaabaroncy1
Kamientary