Łukašenka patłumačyŭ, čamu adzinaj vizy JEAES nie budzie

Na sustrečy z pradstaŭnikami hramadskaści i ŚMI 3 lutaha Alaksandr Łukašenka rastłumačyŭ, čamu nie budzie ŭviedziena adzinaja viza Jeŭrazijskaha ekanamičnaha sajuza (JEAES) dla ŭjezdu ŭ dziaržavy abjadnańnia zamiežnych hramadzian.

Adkazvajučy na pytańnie rasijskaha žurnalista z nahody ŭviadzieńnia Biełaruśsiu z 12 lutaha biaźvizavaha režymu dla hramadzian 80 krain pry ŭjeździe praz Nacyjanalny aeraport Minsk, Łukašenka paviedamiŭ: «My damovilisia z Rapotam (Ryhor Rapota, dziaržsakratar Sajuznaj dziaržavy), što pasprabujem vyvučyć pytańnie našaj adzinaj vizy (dla ŭjezdu zamiežnikaŭ) u JEAES. Ale Nursułtan Nazarbajeŭ (prezident Kazachstana. — BiełaPAN.) skazaŭ: nie, pasprabuj tolki padniać hetaje pytańnie. Raz ty «nie», značyć, hetaha nikoli nie budzie, tamu što pavinien być kansensus, a raz nie budzie pryniata, navošta padymać?»

Jon skazaŭ, što tady było vyrašana prapracavać pytańnie adzinaj vizy dla ŭjezdu hramadzian trecich krain u ramkach Sajuznaj dziaržavy. «I kab nie było supiarečnaściaŭ z budučaj vizaj, my vyrašyli infarmavać (Rasiju), nie kab dać spravazdaču, a tamu što išoŭ inšy praces», — rastłumačyŭ Łukašenka.

Infarmacyju rasijskich ŚMI pra toje, što Biełaruś nie prainfarmavała Rasiju ab pryniaćci rašeńnia ab biaźvizavym ujeździe praz aeraport Minsk, biełaruski kiraŭnik nazvaŭ niapraŭdaj.

Ideja stvareńnia adzinaj vizy Sajuznaj dziaržavy dla ŭjezdu hramadzian trecich krain abmiarkoŭvajecca ŭžo davoli daŭno. Jak paviedamiŭ žurnalistam dziaržsakratar Sajuza Ryhor Rapota ŭ Minsku 28 kastryčnika 2016 hoda paśla pasiadžeńnia hrupy vysokaha ŭzroŭniu Savieta ministraŭ Sajuznaj dziaržavy, pytańnie ŭviadzieńnia ahulnaj vizy Sajuznaj dziaržavy Biełarusi i Rasii «praciahvaje prapracoŭvacca».

«Šmat było razmoŭ pra stvareńnie adzinaj mihracyjnaj i vizavaj prastory. My damovilisia, jak my budziem pa hetych pytańniach pracavać», — adznačyŭ Rapota. Pavodle jaho słoŭ, u bakoŭ jość pryncypovaja zhoda ŭ tym, što isnuje nieabchodnaść uviadzieńnia ahulnaj vizy, i «ideju samu nichto nie adprečvaje». «Ja dumaju, budzie pryncypovaje rašeńnie. Nichto suprać hetaha nie piarečyć, prosta pytańnie, kali heta rabić, na jakich umovach, z ulikam jakich faktaraŭ. Voś heta pavinna być usio ciapier vyrašana. Bo praces intehracyi — vielmi praciahły i karpatlivy», — dadaŭ Rapota.

• 0
• 0
• 0
• 0
• 0
• 0