Makiej rastłumačyŭ, čamu biaźvizavy režym u Biełarusi dziejničaje tolki piać dzion
Ministr zamiežnych spraŭ Biełarusi Uładzimir Makiej pa prośbie Alaksandra Łukašenka patłumačyŭ, čamu ŭ Biełarusi biaźvizavy režym pry prybyćci praz aeraport Minsk dziejničaje tolki piać dzion. Tłumačeńnie było dadzienaje 3 lutaha na sustrečy kiraŭnika dziaržavy z pradstaŭnikami hramadskaści i ŚMI ŭ adkaz na zaŭvahu rasijskaha žurnalista ab tym, što biaźvizavy termin zanadta nievialiki.
Pa słovach Makieja, «ukaz prezidenta rychtavaŭsia vielmi staranna i adkryta», prajšli kansultacyi pamiž ministerstvami zamiežnych spraŭ. «Što tyčycca «piać dzion ci bolš»… Byli radykalnyja prapanovy: tyja, chto pryjazdžaje ŭ biełaruskija sanatoryi, mahli b tam zastavacca na 10-15 dzion. Darečy, MZS vystupaŭ za bolš libieralnyja prapanovy», — dadaŭ kiraŭnik ministerstva.
Jon adznačyŭ, što zhodna ź biełaruskim zakanadaŭstvam inšaziemiec moža znachodzicca ŭ Biełarusi biez rehistracyi ŭ orhanach MUS da piaci dzion. «Taki režym jość i ŭ niekatorych inšych dziaržavach. Tamu my vyrašyli nie łamać sistemu i, jak kažuć u Adesie, hulać pa Dzierybasaŭskaj pastupova. Damovilisia ab znachodžańni zamiežnikaŭ bieź viz na praciahu piaci dzion, kab dziełavyja ludzi prybyli siudy i praviali adpaviednyja pieramovy, tak i dla turystaŭ dastatkovy čas, kab aznajomicca ź niekatorymi słavutaściami Biełarusi, pravieści spartyŭnyja spabornictvy i hetak dalej», — rastłumačyŭ Makiej.
Pa jaho słovach, kali ŭłady ŭbačać, što taki režym zapracavaŭ, to moža być prapanavany i bolš praciahły termin biaźvizavaha znachodžańnia.
Z nahody paprokaŭ z boku Rasii ŭ tym, što biaźvizavy režym niasie pahrozu niesankcyjanavanaha ŭjezdu ŭ RF, Makiej zajaviŭ: «Heta absalutna nie tak. Ničoha ŭ našym režymie nie pamianiałasia. Bolš taho, va ŭkazie vyrazna havorycca pra toje, što siudy mohuć pryjechać zamiežniki, jakija majuć šmatrazovuju šenhienskuju vizu, jakija mohuć prybyć praz Nacyjanalny aeraport Minsk-2 i z paćvierdžanym zvarotnym biletam vyletu. Nijakich novych elemientaŭ, jakija majuć niebiaśpieki dla biełaruska-rasijskaj miažy, nie źjaviłasia», — zapeŭniŭ ministr.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary