Uzarvali, spalili, atrucili: jak skłalisia losy kamandziraŭ «ŁNR» i «DNR»
Na pačatku lutaha nie stała jašče adnaho lidara «Navarosii» — «Hivi» spalili strełam z ahniamiota va ŭłasnym kabiniecie.
Zrešty, amal usie tyja, chto jašče paru hadoŭ tamu śviaciŭsia na rasijskim TB u vobrazie hieroja, užo skončyli žyćcio — maładymi, hvałtoŭna i zaŭčasna, pakinuŭšy siemji i paciahnuŭšy za saboj nabližanych.
I pakul ludzi hadajuć, chto staić za zabojstvami palavych kamandziraŭ, «Naša Niva» vyrašyła pryhadać, jak jany sychodzili.
Biadnoŭ
Adnym ź pieršych u inšy śviet adpraviŭsia Alaksandr «Betmen» Biadnoŭ. Kiraŭnik adnajmiennaj bajavoj hrupy, «ministr abarony ŁNR».
Jon zahinuŭ u pieršy dzień 2015 hoda ŭ vyniku abstrełu jahonaj kałony z ahniamiotaŭ i strałkovaj zbroi. Abhareły trup Biadnova paśla apaznali tyja paplečniki, jakim paščaściła zastacca ŭ žyvych.
Biadnova rasstralali svaje ž — pa viersii «uładaŭ ŁNR» betmenaŭcy zajmalisia rabavańniami, vymahalnictvam, vykradańniami i zahinuli ŭ pierastrełcy pry zatrymańni.
Da pačatku «ruskaj viasny» Biadnoŭ pracavaŭ achoŭnikam u načnym kłubie.
«Bacia»
Jašče adnoj adčuvalnaj strataj dla rasijskaha TB staŭ Pavieł Dromaŭ ź mianuškaj «Bacia».
«Baciu» zabili z asablivym cynizmam — mašynu padarvali kiravanym vybucham u momant, kali toj jechaŭ śviatkavać ułasnaje viasielle na małuju radzimu.
Tak u 39 hadoŭ abarvałasia žyćcio kazackaha «hienierał-majora», jaki da vajny pracavaŭ mularam i nikoli nie nasiŭ pahonaŭ vyšej za siaržanckija, ale ŭ «ŁNR» staŭ kiravać pałkom milicyi.
Arsień Paŭłaŭ («Mataroła»)
«Mataroła» — čałaviek, uźlot i padzieńnie jakoha niepasredna źviazanyja ź liftami.
Spačatku sacyjalny lift «Navarosii» uzvysiŭ hetaha aŭtamyjščyka ź siaredniaj adukacyjaj da «pałkoŭnika» i kiraŭnika bataljona, a ŭ lifcie ŭłasnaha padjezda jaho ŭzarvali.
Hety adyjozny palavy kamandzir nie raz chvaliŭsia, što ŭłasnaručna rasstrelvaŭ pałonnych ukrainskich sałdat. Pry kancy žyćcia Paŭłaŭ adčuvaŭ niebiaśpieku i atačyŭ siabie ciełaachoŭnikami, ale hetym nie vyratavaŭ ni siabie, ni ich, zahinuŭšy ŭ 33 hady.
Mazhavoj
Jašče adzin papularny palavy kamandzir Alaksiej Mazhavoj da vajny śpiavaŭ u mužčynskim chory i pracavaŭ u vajenkamacie, a z pačatkam vajny staŭ kiraŭnikom bataljona «Pryvid».
Padčas vajny Mazhavy adčuŭ smak ułady, što vyraziłasia ŭ tym liku ŭ zahadzie aryštoŭvać łuhanskich žančyn za naviedvańnie baraŭ.
Ale skončyŭ Mazhavy nie vielmi aryhinalna — jaho rasstralali ŭ mašynie razam z paraj paplečnikaŭ.
Milicyjanier Aleh Anaščanka
Jašče adnaho kiraŭnika bajevikoŭ — «načalnika narodnaj milicyi ŁNR» — Aleha Anaščanku taksama likvidavali ŭ mašynie, prosta ŭzarvaŭšy jaje padčas ruchu.
Jaŭhien Iščanka
«Narodnaha mera» Pieršamajska, jaki sam pachodziŭ z Rasii, prosta rasstralali pasiarod vulicy razam z paraj paplečnikaŭ.
Heta byŭ adzin z samych papularnych «kazackich hienierałaŭ» u ŁNR, jaki pahražaŭ miascovym žycharam śmierciu za niazručnyja pytańni pra toje, čamu bajaviki staviać harmaty ŭ žyłych rajonach horada.
Hienadź Cypkałaŭ
Inšy dziejač «ŁNR» — eks-«premjer-ministr» Hienadź Cypkałaŭ paviesiŭsia ŭ turmie ŭ 43 hady. Zrešty, jak śćviardžajuć niekatoryja kalehi Cypkałava, taho nasamreč zadušyli, prosta abstaviŭšy spravu jak samahubstva.
U hetym šerahu možna ŭspomnić jašče «kazackaha kamandzira» Mikałaja Kazicyna, jakomu, praŭda, paščaściła — u mižsabojnaj pierastrełcy zabili amal usich jaho ludziej, ale samomu Kazicynu ŭdałosia ŭciačy i schavacca ŭ Rasii.
Prykładna taki ž los u Hirkina-Strałkova i Bieźlera. Jany ŭciakli z zony bajavych dziejańniaŭ i ciapier adsiedžvajucca ŭ spakojnych miescach, časam papisvajučy ŭ sacyjalnych sietkach.
Praŭda, ucioki nie harantujuć cichaha žyćcia.
Zusim niadaŭna ŭ Rasii raptoŭna pamierli jašče dva byłych funkcyjaniery «Navarosii» — Jaŭhien Žylin i Valeryj Bołataŭ.
Pieršy ź ich byŭ kiraŭnikom arhanizacyi «Apłot», razam z Zacharčankam šturmavaŭ Danieck, paśla zrabiŭ sa svajoj arhanizacyi vajenizavany korpus.
Žyćcio Žylina abarvałasia ŭ padmaskoŭnym restaranie, dzie jaho va ŭpor rasstralali nieviadomyja.
Bołataŭ ža byŭ «narodnym hubiernataram Łuhanskaj vobłaści». Heta jahonyja ludzi pry ŭdziele «siabroŭ z Rasii» šturmavali Łuhanskaje SBU. Praŭda, praź niejki čas Bołataŭ zvolniŭsia, pakinuŭšy pasadu kiraŭnika ŁNR Płatnickamu, i pierajechaŭ u Rasiju, raspačaŭšy biźnies.
Jon pamior u niajasnych abstavinach. Mahčyma, na adnoj ź dziełavych sustreč jaho atrucili — jon pražyŭ jašče dzień, paśpieŭšy paskardzicca žoncy na kiepskaje samaadčuvańnie paśla vypitaj sa znajomymi kavy.
U Bołatava zastalisia dzieci.
Taksama varta pryhadać Siarhieja Traćciakova, jaki byŭ «namieśnikam ministra pramysłovaści i handlu DNR». Traćciakoŭ braŭ aktyŭny ŭdzieł u arhanizacyi psieŭdarefierendumaŭ i zajmaŭsia raźmierkavańniem humanitarki. Sioleta, u adzin dzień z Bołatavym, va ŭzroście 40 hadoŭ jon «raptoŭna» pamior ad nieviadomych pryčyn.
Žyvymi (pakul?) zastajucca Baradaj, Hubaraŭ dy Pušylin, były kiraŭnik danieckaha AMAPa Chadakoŭski, a taksama kiraŭniki kalibra Zacharčanki dy Płatnickaha, jakija ŭžo pieražyli zamachi.
Vajna, machavik jakoj raskrucili z dapamohaj hetych ludziej, nie škadavała nikoha — dyj sami jany atrymlivali asałodu ad ułady vielmi karotki čas.
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim12
«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim
Babaryka i Kaleśnikava pahavaryli ź Inhaj Ruhinienie i zaklikali Litvu «dałučycca da dypłamatyčnych namahańniaŭ ZŠA» i «nie prapuścić akno mahčymaściej»3333
Kamientary