Były pieršy namieśnik ministra ŭnutranych spraŭ hienierał-major milicyi Alaksandr Ščurko źjaŭlajecca pradstaŭnikom litoŭskaj kampanii ARVI ŭ Biełarusi. Pra heta stała viadoma žurnalistam TUT.BY paśla adkryćcia novaha pradpryjemstva pa vytvorčaści pradukcyi ź miasa indyčki ŭ Lidskim rajonie.
U 90-ja hh. Ščurko ŭznačaliŭ abjadnańnie «Achova» pry MUS. U 2001 hodzie byŭ pryznačany pieršym namieśnikam ministra ŭnutranych spraŭ, kuryravaŭ milicyju hramadskaj biaśpieki i śpiecyjalnuju milicyju. Paźniej jamu dadali paŭnamoctvy načalnika kryminalnaj milicyi.
U 2007 hodzie Alaksandr Ščurko byŭ papiaredžany ukazam prezidenta ab niapoŭnaj słužbovaj adpaviednaści. Padstavaj pasłužyli chiby pa svoječasovamu vykryćciu i spynieńni złačynnaj dziejnaści byłoha kamandzira roty Haradzienskaha adździeła Departamienta achovy MUS Siarhiejčyka, jaki ździejśniŭ šerah naŭmysnych zabojstvaŭ i inšych ciažkich złačynstvaŭ.
Praz hod Ščurko zaśviaciŭsia ŭžo ŭ «dačnym skandale» z udziełam siłavikoŭ. Pavodle słoŭ Łukašenki, «10 vysokapastaŭlenych słužbovych asob MUS naŭmysna pajšli na parušeńnie zakanadaŭstva, kab atrymać ziamielnyja nadzieły ŭ Minskim rajonie amal zadarma».
Nieŭzabavie paśla hetaha ŭsie jany, u tym liku i hienierał-major milicyi Alaksandr Ščurko, byli vyzvalenyja ad svaich pasadaŭ.
U 2009 hodzie Alaksandr Ščurko uładkavaŭsia namieśnikam načalnika transpartnaj inśpiekcyi Ministerstva transpartu i kamunikacyj.
I voś niadaŭna jon «uspłyŭ» u hrupie kampanij ARVI viadomaha litoŭskaha biznesmiena Vidmantasa Kučynskasa. Hetaja struktura abjadnoŭvaje bolš za 20 pradpryjemstvaŭ u Litvie, Łatvii, Rasii, Rumynii, Ukrainie, Charvatyi. Alaksandr Ščurko pradstaŭlaje intaresy ARVI ŭ Biełarusi, uznačalvajučy naziralnuju radu jaje biełaruskaj «dački» — «Arvibiełahra».
Na pačatku hetaha hoda ARVI zapuściła ŭ Lidskim rajonie pradpryjemstva pa pierapracoŭcy miasa indyčki mahutnaściu kala 5,5 tys. ton za hod. U kompleksu nie tolki zavod pa zaboju i pierapracoŭcy miasa, ale i fiermy dla maładniaku i adkormu ptuški.
Da hetaha litoŭskaj kampanijaj byŭ pabudavany zavod pa pierapracoŭcy adchodaŭ žyviolnaha pachodžańnia. Ahulny abjom inviestycyj skłaŭ kala 50 młn jeŭra, kala 70% ź jakich składajuć kredyty «BPS-Aščadbanka».
U 2018 hodzie «Arvibiełahra» u metach dalejšaj realizacyi prajekta płanuje ŭvieści ŭ ekspłuatacyju kambikormavy zavod.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy26
Kamientary