Prajšła sustreča kiraŭnikoŭ Biełarusi i Venesueły.
Biełaruś i Venesuełu źviazvajuć nia tolki ŭzajemnyja intaresy, ale i sapraŭdnaja družba, skazaŭ kiraŭnik Biełarusi padčas sustrečy z Uha Čavesam. Uvohule, kali vieryć paviedamleńniam dziaržaŭnych ahienctvaŭ, to razmova miž dvuma kiraŭnikami prachodziła vyklučna ŭ abstanoŭcy kamplimentaŭ.
Łukašenka padziakavaŭ Čavesu za toje, što jon usio ž zavitaŭ u Biełaruś, niahledziačy na stomu ad pieralotaŭ, a taksama paabiacaŭ «pa‑bracku» vyrašać lubyja pytańni dla Venesueły.
«Havary, što treba rabić i my budziem rabić», — skazaŭ Łukašenka.
U paŭdniovaamerykanskaha lidera taksama na kožnaje słova adkaz byŭ hatovy. Jon skazaŭ, što niemahčyma pralatajučy mima nie zazirnuć u Biełaruś, kab prademastravać «lepšaje pačućcio družby da vašaha hieraičnaha narodu».
Jak paviedamlaje BIEŁTA , padčas sustrečy ŭ farmacie «tet‑a‑tet» Uha Čaves skazaŭ, što chacieŭ by pravieryć vykanańnie dvuchbakovych prajektaŭ, a taksama raniej dasiahnutych damovaŭ. Nieviadoma, ci tut havorka išła tolki pra pastaŭku ŭ Karakas MAZaŭ i budaŭnictva venesuelskich ahraharadkoŭ?
Darečy, adrazu pa prylocie ŭ Miensk Čaves pasprabavaŭ abvierhnuć čutki pra zaklučany ŭ Maskvie kantrakt u vajskovaj sfery na 30 miljardaŭ dalaraŭ.
Kiraŭnika Venesueły ŭ Nacyjanalnym aeraporcie «Miensk-2» sustrakali nia tolki vice‑premjer Uładzimier Siamaška i namieśnik kiraŭnika MZS Viktar Hajsionak, ale i biespasadny Viktar Šejman. Jahonaja prysutnaść była rastłumačanaja tym, što jon zajmaje pasadu kiraŭnika biełaruska-venesuelskaj mižuradavaj kamisii.
Nahadajem, što ŭ traŭni Interpoł paćvierdziŭ sapraŭdnaść noŭtbuka z elektronnym listom lidera kalumbijskich partyzanaŭ, u jakim toj havoryć, što venesuelski prezydent Uha Čaves sprabuje ŭzbroić kalumbijskich paŭstancaŭ z dapamohaj Biełarusi.
Hišpanskaja El Pais śćviardžała, što najlepšym siabram kalumbijskich partyzanaŭ moh akazacca ŭžo były dziaržaŭny sakratar Rady biaśpieki Viktar Šejman. Mienavita jon byŭ adnym z tych, chto prabivaŭ padpisanyja letaś kantrakty na pastaŭku zbroi ŭ Venesuełu na 720 młn eŭra.
«Ja nie źbirajusia zajmacca ŭsiakimi vyčvarenstvami, jaki raspaŭsiudžvajuć roznyja ahienctvy», — zajaviŭ prezydent Venesueły.
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach5
Kamientary