U sudzie Akciabrskaha rajona (Homielskaja vobłaść) 17 lutaha zaviaršyŭsia razhlad administracyjnaha pratakoła, składzienaha milicyjanierami ŭ dačynieńni da aktyvistki Abjadnanaj hramadzianskaj partyi, lidara «Maładych demakrataŭ» Aleny Łuckovič. Miesiac tamu, 17 studzienia, jana razam z błohieram Andrejem Pavukom pravodziła apytańnie miascovych žycharoŭ, što milicyja rascaniła jak drobnaje chulihanstva (artykuł 17.1 KoAP).
Zhodna ź milicejskim pratakołam, Łuckovič «naŭmysna, biespadstaŭna, nieadnarazova spyniała i prystavała da hramadzian, patrabavała adkazać na jaje pytańni, na prośby hramadzian adstać nie reahavała, čym parušyła hramadski paradak i spakoj hramadzian».
Aktyvistka AHP i błohier zdymali siužet dla supolnaści ŭ sacyjalnaj sietcy «Rudabielskaja pakazucha». Jany chacieli pačuć mierkavańnie miascovych žycharoŭ pra vybary — nakolki jany sumlennyja i spraviadlivyja.
Sudździa Ludmiła Hormaš 17 lutaha vyniesła rašeńnie ab tym, što Łuckovič vinavataja ŭ drobnym chulihanstvie, bo «naŭmysna, biespadstaŭna, nazojliva, nieadnarazova spyniała i čaplałasia da hramadzian, patrabavała adkazać na jaje pytańni, na prośby hramadzian pakinuć ich u spakoi nie reahavała». Lidar «Maładych demakrataŭ» vinu nie pryznała i dla abhruntavańnia svajoj nievinavataści padała videazapis apytańnia. Videa sud nie pryniaŭ da ŭvahi, bo «zapis ź pierapynkami, zafiksavany ŭ dačynieńni da kožnaha hramadzianina asobna, takim čynam, nie źjaŭlajecca poŭnaj fiksacyjaj».
Łuckovič pakaranaja štrafam u 15 bazavych vieličyń (345 rubloŭ).
17 studzienia ŭ milicyju patelefanavaŭ namieśnik načalnika adździeła ideałahičnaj pracy rajvykankama Siarhiej Zaryčny. Jon zaŭvažyŭ na centralnaj płoščy Andreja Pavuka i Alenu Łuckovič, jakija «rabili niejkaje apytańnie hramadzian», i vyrašyŭ, što jany parušajuć hramadski paradak.
Milicyja apytała troch rabotnikaŭ rajvykankama, da jakich byccam by prystavała Łuckovič. Načalnik adździeła arhanizacyjna-kadravaj pracy Taćciana Siemianiec, načalnik upraŭleńnia pa pracy, zaniataści i sacyjalnaj abaronie Taćciana Habinietava i hałoŭny śpiecyjalist adździeła architektury i budaŭnictva Iryna Dułub napisali, što paśla «nazojlivych čaplańniaŭ» Łuckovič byŭ parušany ich emacyjny spakoj, što paŭpłyvała na ažyćciaŭleńnie pracoŭnaj dziejnaści.
Habinietava paskardziłasia ŭ milicyju, što Łuckovič «rezkim rucham» zastupiła joj «ruch na pracu ŭ budynak RVK» i stała «pichać» joj u tvar mikrafon.
Aktyvistka rasceńvaje dziejańni miascovych milicyi, čynoŭnikaŭ i suda jak pieraśled pavodle palityčnych matyvaŭ.
«Absurdnaja i śmiešnaja situacyja, z adnaho boku, i sumnaja — ź inšaha. Čynoŭniki ŭ nas jak kasta niedatykalnych, da ich nielha padychodzić, nielha zadavać pytańni. Ź inšaha boku, u ich vielmi słabaja psichika, raz paśla adnaho pytańnia ab vybarach jany stracili emacyjny spakoj i nie zdoleli pracavać», — prakamientavała rašeńnie suda Łuckovič.
Jana ličyć, što spakoj čynoŭnikaŭ parušyła pytańnie ab vybarach, bo mnohija rabotniki rajvykankama zasiadajuć va ŭčastkovych i akruhovych kamisijach i «kamu, jak nie im, viedać pra falsifikacyi».
Aktyvistka AHP budzie abskardžvać rašeńnie suda ŭ vyšejšaj instancyi.
