Ździełka kupli‑prodažy domu pieršaha izrailskaha prezydenta Chaima Vejcmana ŭ vioscy Motal była aformlenaja siońnia.
Novy ŭładalnik siadziby kiraŭnik analityčnaha biełaruskaha centru EcooM Siarhiej Musijenka ŭstrymlivajecca ad kamentaroŭ adnosna jaje pamieraŭ.
Raniej u interviju Svabodzie byłaja ŭładalnica Alena Ptašyc paviedamiła, što choča atrymać za hety dom 15 tysiač dalaraŭ, «a kali daduć bolej, to taksama nie admovicca».
Jak zajaviŭ Siarhiej Musijenka, jon maje namier stvaryć «kulturalahičny kompleks, pryśviečany pamiaci Chaima Vejcmana — vydatnaha palityka j arhanizatara». Pavodle Musijenki, hety kompleks, biez sumnievu, stanie sapraŭdnaj prynadaj dla turystaŭ, historykaŭ, tych, kamu cikavaja historyja, paviedamlaje ahienctva Intierfaks.
Pavodle specyjalistaŭ hetaj pabudovie patrebny hruntoŭny ramont. U domie, jaki kaliści naležaŭ zamožnaj habrejskaj siamji Vejcmanaŭ, aryhinalnaj zastałasia tolki adna ściana.
Analityčny centar «EcooM», jakim kiruje Siarhiej Musijenka, uźnik pierad pačatkam referendumu 2004 hodu ab padaŭžeńni prezydenckich paŭnamoctvaŭ A.Łukašenki. Vyjaviłasia, što «EcooM» — heta brend, handlovaja marka firmy «Medyjafakt‑EKA», jakoj kiruje Siarhiej Musijenka. Centar siarod inšaha zajmajecca sacyjalahičnymi daśledavańniami. Naprykład 19 sakavika 2006 hadu eksperty «EcooM» śćviardžali, što 84,2% apytanych pry vychadzie z vybarčych učastkaŭ addali svaje hałasy za Alaksandra Łukašenku.
Paśla vybuchu ŭ časie śviatkavańnia ŭ Miensku aficyjnaha Dnia niezaležnaści Siarhiej Musijenka źviarnuŭsia ŭ Mienharvykankam z prapanovaj ab ŭviadzieńni maratoryja na praviadzieńnie masavych akcyj apazycyi. Prynamsi da taho času, pakul nia budzie raskrytaje złačynstva i nia buduć znojdzieny arhanizatary i vykanaŭcy. « Kali b padobnaje zdareńnie adbyłosia na 90‑hodzie BNR, možacie ŭjavić sabie, u čym by tolki nie abvinavačvali ŭładu, jakimi b sankcyjami nie pahražali Biełarusi», zajaviŭ tady Musijenka ŭ interviju «Intierfaksu».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary