A 3-j nočy 23 lutaha nieviadomyja napali na ŭdzielnikaŭ akcyi abarony Kurapataŭ. Pra heta paviedamiŭ sajtu Pyx.by siabra ruchu Alaksiej Klušničenka, jaki zastaŭsia načavać na terytoryi budoŭli kala Kurapataŭ.
Pavodle jahonych słovaŭ, načavać usiaho zastavalisia kala 10 aktyvistaŭ. Na viečar 22 lutaha abstanoŭka tam była spakojnaja. Adnak da nočy situacyja źmianiłasia.
«Tam usich pakłali!» — apisaŭ situacyju Klušničenka. Jamu i jašče piaci aktyvistam udałosia źbiehčy ŭ les.
Radyjo Svaboda dadaje, što nieviadomyja byli ŭ maskach z draŭlanymi zavostranymi pałkami.
Pavodle śviedčańniaŭ vidavočcaŭ, napadnikaŭ było ad 15-20 čałaviek. Jany łajalisia, vykrykvali «Słava Rasii» i «Biełaja rasa». Nieviadomyja razburyli namiot, sarvali bieł-čyrvona-biełyja ściahi i pierakulili bočku z vohniščam.
Byŭ paranieny Aleś Kirkievič, jaho ŭdaryli bitaj
Usio doŭžyłasia nie bolš za chvilinu. Napadniki bili abaroncaŭ, byŭ paranieny vałancior Aleś Kirkievič — jaho ŭdaryli draŭlanaj bitaj pa skroni.
Pa źviestkach namieśnika staršyni ruchu «Za svabodu» Juryja Mielaškieviča, łahier u Kurapatach razhramili małodčyki u maskach, jakija kryčali «Biełaja rasa!».
«Jany nakinulisia na tych, chto byŭ la bočki, pakłali ich na ziamlu i pačali źbivać. Sarvali ściahi i zaburyli bočku», - skazaŭ Mielaškievič.
Potym nieviadomyja spužalisia krykaŭ ludziej, jakija pryjechali na dapamohu ŭdzielnikam abarony i źbiehli. Na hety momant situacyja ŭ łahiery spakojnaja.
Na 23 lutaha była zapłanavanaja sustreča hramadskaści ŭ Minharvykankamie, i na hety čas abiacali spynić budoŭlu.
Na miesca prybyŭ staršynia Partyi BNF Alaksiej Janukievič i Źmicier Daškievič. Na dadzieny momant kala dvuch dziasiatkaŭ abaroncaŭ zastajucca ŭ łahiery i abmiarkoŭvajuć dalejšy płan dziejańniaŭ.
Na miesca zdareńnia pratestoŭcy vyklikali milicyju, dadaje Radyjo Svaboda.
