Naščadak słynnaha rodu Maciej Radzivił pryvioz u Miensk 99 pradmietaŭ sa svajoj kalekcyi tvoraŭ mastactva.
Vystava pad nazvaj «Radziviły: losy krainy i rodu» prachodzić u Nacyjanalnym mastackim muzei Biełarusi z 15 lutaha.
«Ja maju ćviordaje pierakanańnie, što mastackija kalekcyi treba zaŭsiody pakazvać, nielha zakryvać u domie kalekcyjanera. Tamu heta ŭžo druhaja vystava, jakuju ja rablu ŭ Biełarusi. Dva hady tamu nazad była maleńkaja vystava ŭ Niaśvižy, tam taksama ŭdzielničali tvory mastactva z majoj pryvatnaj kalekcyi. Ja liču, vielmi važna, kab hetyja karciny, źviazanyja z rodam Radziviłaŭ, vystaŭlalisia ŭ Biełarusi. Tamu što najvialikšaja spadčyna Biełarusi — heta Vialikaje Kniastva Litoŭskaje. A rod Radziviłaŭ nieparyŭna źviazany z hetaj dziaržavaj. Ja, darečy, kali pytajucca pra nacyjanalnaść, kažu, što ja hramadzianin Vialikaha Kniastva Litoŭskaha. I šmat maich siabroŭ robiać hetak».
U ekspazycyi možna pabačyć partrety Barbary Radzivił, jejnaha baćki Juryja Radziviła, Mikałaja Kryštafa Radziviła «Sirotki», jaho brata Juryja, Katažyny z Sabieskich, Michała Kazimira Radziviła «Rybańki», Karala Stanisłava Radziviła «Panie Kachanku» dy inšych pradstaŭnikoŭ rodu.
Maciej Radzivił skazaŭ, što hetym razam pryvioz u Miensk 99 adzinak — heta partrety Radziviłaŭ, hraviury, hrafika, minijatury, medali, mastackija tkaniny. Jon raskazaŭ, što vyrašyŭ kalekcyjanavać tvory mastactva paśla taho, jak stvaryŭ biznes i zarabiŭ hrošy.
«Kali ŭžo zajmieŭ hrošy, pačaŭ nabyvać karciny na aŭkcyjonach. Da taho ž ja zaŭsiody imknusia daviedacca nia tolki historyju asoby, partret jakoj nabyvaju, ale i historyju samoj karciny: kamu jana naležała, dzie znachodziłasia».
Adnak samyja darahija dla Macieja Radziviła karciny — tyja, jakija pryjšli ŭ jahonuju kalekcyju z domu jahonaj babuli:
«Ja pamiataju ich ź dziacinstva, ja ros ź imi, tamu hetyja karciny dla mianie samyja darahija i važnyja. Samaja darahaja karcina — majstra Julijana Fałata, jana visieła ŭ domie majoj babuli, i ja viedaŭ historyju kožnaha čałavieka, jaki tut namalavany. Tut scena zimovaha palavańnia, i niezvyčajna, što palaŭničyja zabili miadźviedzia (jany ž śpiać uzimku). U nas u siamji byŭ žart, što miadźviedzia razbudzili, bo na palavańnie pryjechaŭ niamiecki kronprync. Paśla hetaja karcina trapiła ŭ depazyt nacyjanalnaha muzeju ŭ Varšavie, nazad jana viarnułasia ŭ kancy 60-ch hadoŭ».
Maciej Radzivił taksama adznačyŭ, što na aŭkcyjonach vielmi pilna dbaje pra aryhinalnaść tvoraŭ, jakija nabyvaje. Kožny tvor prachodzić jak minimum dźvie ekspertyzy.
«Ciapier niaciažka zrazumieć uzrost karciny. Da taho ž bolšaść partretaŭ Radziviłaŭ pisali abo čalcy ichnaj ža siamji, abo nieviadomyja mastaki. Tamu vielmi vialikaj kaštoŭnaści ŭ bolšaści karcin niama. Ja maju na ŭvazie, što naŭrad ci ich buduć padrablać, jak, skažam, karciny Leanarda da Vinčy».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary