Žycharka Rečycy pakaranaja za abrazu biełaruskaj movy

Žycharka Rečycy Jaŭhienija Čaćviartnaja pakaranaja za abrazu biełaruskaj movy (artykuł 9.22 Kaap).

Pavialičyć

Raźbiralnictva pačałosia ŭ śniežni 2016 hoda. Inicyjatar hramadzianskaj kampanii «Spravavodstva pa-biełarusku!» Ihar Słučak nakiravaŭ zajavu ŭ Rečycki rajvykankam. Jon paviedamiŭ, što 1 śniežnia 2016 hoda ŭ hrupie «Mocnyja naviny» — navinavy pablik Homiela» ŭ sacyjalnaj sietcy «VKontaktie» žycharka Rečycy pakinuła kamientar: «Biełorusskij jazyk nieprijatien na słuch. Da i voobŝie, biełor. jazyk — eto nielepoje assorti iz russkoho i polskoho». Zajaŭnik paličyŭ, što takim vykazvańniem u publičnaj prastory Čaćviartnaja parušyła artykuł 9.22 KaAP, publična abraziŭšy biełaruskuju movu. Ihar Słučak prasiŭ pryciahnuć hramadzianku da adkaznaści.

Adkazu z rajvykankamu zajaŭnik nie atrymaŭ. 14 lutaha jon źviarnuŭsia ŭ prakuraturu Rečyckaha rajona z prośbaj pravieści pravierku i rastłumačyć, čamu rajvykankam nie daŭ svoječasova adkaz na zvarot.

«Pa vyniku razhladu vašaj zajavy namieśnikam načalnika adździeła ideałahičnaj raboty, kultury i pa spravach moładzi Rečyckaha rajvykankama 31 studzienia była vyniesienaja pastanova ab administracyjnym spahnańni ź Jaŭhienii Čaćviartnoj pa artykule 9.22 KaAP», — adznačyŭ u adkazie prakuror Rečyckaha rajona Mikałaj Biełarusaŭ. Zychodziačy ź lista prakuratury, rajvykankam davaŭ adkaz Słučaku, ale toj jaho nie atrymaŭ.

«Jaŭhienija Čaćviartnaja atrymlivała jurydyčnuju adukacyju ŭ toj ža VNU, što i ja, pracavała sudovym vykanaŭcam, tamu jana nie mahła nie razumieć, što padobnyja vykazvańni niedapuščalnyja i abraźlivyja, a adukavany čałaviek tak siabie pavodzić nie moža i nie pavinien. Varta adznačyć, što abraźlivy kamientar jana pakinuła pad tym ža zapisam u pabliku, dzie pakinuŭ svoj abraźlivy kamientar były milicyjant Vasil Varuščanka, jaki taksama praz sud byŭ pakarany za abrazu biełaruskaj movy», — zajaviŭ Słučak.

U cełym jon zadavoleny pastanovaj Rečyckaha rajvykankama. «Ja ŭ svoj čas prachodziŭ tam praktyku i mahu adznačyć, što tam pracujuć dobryja śpiecyjalisty, jakija pry ŭsioj składanaści dadzienaj spravy paśpieli ŭkłaścisia ŭ termin: kali b pastanova była vyniesienaja na dzień paźniej, Jaŭhienija Čaćviartnaja zmahła b paźbiehnuć adkaznaści. Spadziajusia, hety vypadak budzie navukaj dla tych, chto ličyć, što źbirać «łajki» u sacyjalnych sietkach za košt abrazy nacyjanalnaj movy — dobraja ideja», — skazaŭ inicyjatar hramadzianskaj kampanii «Spravavodstva pa-biełarusku».

• 0
• 0
• 0
• 0
• 0
• 0
• 0
• 0