Słužba biaśpieki Ŭkrainy źviarnułasia da biełaruskich kaleh z zapytam pra dakładnuju infarmacyju, jakaja b paćviardžała najaŭnaść na terytoryi Ŭkrainy «lahieraŭ pa padrychtoŭcy bajevikoŭ dla arhanizacyi pravakacyj u Biełarusi», jak napiaredadni zajaviŭ Alaksandar Łukašenka.
«Našy specsłužby nakiravali adpaviedny zapyt pa našych najaŭnych kanałach kantaktaŭ z pravaachoŭnymi i specyjalnymi orhanami Respubliki Biełaruś, i my čakajem dadatkovaj infarmacyi ad našych kaleh. Pakul što takoj dadatkovaj, detalovaj infarmacyi, aproč toj, što była ahučanaja prezydentam Respubliki Biełaruś, u nas niama», — skazaŭ siońnia na bryfinhu ŭ Kijevie kiraŭnik aparatu staršyni Słužby biaśpieki Ŭkrainy Alaksandar Tkačuk.
Pradstaŭnik SBU padkreśliŭ, što specylnyja słužby Ŭkrainy «vielmi surjozna pastavilisia da toj infarmacyi, što ahučyŭ prezydent Respubliki Biełaruś».
Aproč taho, Alaksandar Tkačuk zajaviŭ, što infarmacyja, raspaŭsiudžanaja biełaruskimi pamiežnikami pra nibyta praryŭ aŭtamabilem dziaržaŭnaj miažy Biełarusi, taksama nie paćviardžajecca. «Pavodle aperatyŭnych dadzienych, havorka idzie pra transpartny srodak, jaki znachodziŭsia ŭ «šeraj zonie». Ale z ukrainskaha boku — i našyja pamiežniki heta vielmi staranna pravieryli — nijakaha pierasiačeńnia nijakimi transpartnymi srodkami nie adbyłosia», — dadaŭ kiraŭnik aparatu staršyni Słužby biaśpieki Ŭkrainy.
***
21 sakavika ŭ časie razmovy ŭ Mahilovie z supracoŭnikami kampanii «Kronaspan» Łukašenka, u pryvatnaści, skazaŭ: «My ŭžo niekalki dziasiatkaŭ zatrymali (nia tych, što ŭ aŭtobusach, anarchistaŭ z maskami), jakija trenavalisia ŭ lahierach z zbrojaj. Darečy, adzin ź lahieraŭ byŭ u rajonie Babrujsku i Asipovičaŭ. Astatnija lahiery — va Ŭkrainie, pa-mojmu, u Litvie ci ŭ Polščy (nia budu śćviardžać, ale niedzie tam)».
Dziaržaŭny pamiežny kamitet Biełarusi 20 sakavika paviedamiŭ pra sprobu «praryvu» praź dziaržaŭnuju miažu Biełarusi ŭ rajonie prapusknoha punktu «Alaksandraŭka» z užyvańniem tabelnaj zbroi.
