Šlubny afieryst z Homiela razam z maci vymaniŭ u žančyn kala 90 tysiač dalaraŭ

Usiaho z 2009-ha pa 2016 hod złamyśniki padmanuli bolš za try dziasiatki čałaviek. Čaściej za ŭsio ich achviarami stanavilisia žančyny. Jany traplali pad abajańnie hamialčanina, jaki prykidvaŭsia bahatym žanichom, paviedamili BIEŁTA va ŭpraŭleńni Śledčaha kamiteta pa Homielskaj vobłaści.

39-hadovy žychar abłasnoha centra budučych «niaviest» vybiraŭ u internecie i praktyčna adrazu prapanavaŭ im sustrecca. Na spatkańniach jon raspaviadaŭ dziaŭčatam ab tym, što vałodaje karaokie-kłubam, sałonami pryhažości ŭ Kijevie i Maskvie, žyłoj nieruchomaściu. Dadavaŭ, što źjaŭlajecca ŭkrainskim deputatam abo ŭładalnikam bujnoha pradpryjemstva. Usim novym znajomym, a siarod ich byli žycharki Homielskaj, Mahiloŭskaj, Minskaj i Viciebskaj abłaściej, machlar abiacaŭ ažanicca. Kali kančatkova ŭciraŭsia ŭ davier, pačynaŭ prasić hrošy ŭ doŭh. Finansavyja składanaści tłumačyŭ roznymi pryčynami. Umudraŭsia vymańvać hrošy za košt taho, što prapanoŭvaŭ kupić vybrańnicy aŭtamabil, na jaki nibyta zusim krychu nie chapaje. Dziaŭčaty addavali jamu zanački, jakija źbirali hadami, i navat brali kredyty ŭ bankach.

Maci šlubnaha afierysta zajmała nie apošniaje miesca va ŭsich machinacyjach. 66-hadovaja žančyna hrała rolu budučaj śviakruchi, kali syn pryvodziŭ vybrańnic znajomicca, zabirała ŭ dziaŭčat hrošy. Akramia taho, žančyna i sama razyhryvała złačynnyja scenary. Naprykład, kab uhavaryć adnaho sa znajomych uziać kredyt u banku, jana vydumała, što ŭ jaje ŭnučki ankałohija i dla lačeńnia nieabchodna $30 tysiač. Unučka ŭ machlarki sapraŭdy jość. Dziaŭčynka, na ščaście, zdarovaja i pražyvaje razam z byłoj niaviestkaj u Kijevie.

Jak prainfarmavali va ŭpraŭleńni Śledčaha kamiteta pa Homielskaj vobłaści, rasśledavańnie kryminalnaj spravy, u jakim naličvajecca 51 fakt złačynnaj dziejnaści, zavieršanaje, jana pieradadziena ŭ sud. Ahulnaja suma škody, naniesienaj dziejańniami kryminalnaha dueta, skłała bolš za 170 tysiač rubloŭ. Ad dačy pakazańniaŭ maci i syn admovilisia. Za ździejśnienyja złačynstvy im pahražaje da 10 hadoŭ pazbaŭleńnia voli z kanfiskacyjaj majomaści.

• 0
• 0
• 0
• 0
• 0