Tałuła-jakaja-tančyć-havajski-taniec-«chuła» zmahła pamianiać svajo abrydłaje za 9 hadoŭ imia tolki praz sud. U dzietak ź imionami kštałtu Prypynak-aŭtobusa-№16 dy Hvałt źjaviŭsia šaniec nazvacca pa-ludzku, nie čakajučy paŭnalećcia.
Dzieviacihadovia dziaŭčyna Talula Does The Hula From Hawaii zmahła pamianiać nienavisnaje joj imia tolki pad apiekaj sudu.
Pavodle słoŭ sudździ Roberta Merfita, imia, dadzienaje dziaŭčynie pry naradžeńni baćkami, biantežyć jaje dy vyklikaje naśmieški.
U dasłoŭnym pierakładzie imia dzicia Talula Does The Hula From Hawaii aznačaje «Tałuła tančyć havajski nacyjanalny taniec «chuła».
Prablema ŭspłyła padčas słuchańniaŭ spravy pra apieku ŭ sudzie novazelandzkaha horadu Ńju-Plimut. Tady niečakana vyśvietliłasia, što dzicio admaŭlajecca nazyvać svajo poŭnaje imia, a pradstaŭlajecca inicyjałam «K».
«Sud byŭ hłyboka zaniepakojeny duža niedalnabačnymi matyvami, jakimi kiravalisia baćki dziaŭčynki pry vybary joj imia, — napisaŭ sudździa Merfit. — Hetaje imia vystaŭlaje dzicio ŭ durackim śviatle j stvaraje hlebu dla sacyjalnaj niepaŭnacennaści».
Dziakujučy pryniatamu rašeńniu pra pieradaču dziaŭčynki pad sudovuju apieku, Tałule ŭdałosia źmianić nienavisnaje imia biaz zhody baćkoŭ. Novaje imia nie razhałošvajecca pavodle etyčnych mierkavańniaŭ.
Moda siarod baćkoŭ na toje, kab davać svaim naščadkam vyčvarnyja j nienaturalnyja imiony, vartaja hańby dy saramačańnia, ličyć sudździa Merfit.
Jon pryvioŭ niekalki prykładaŭ supiarečlivaj palityki ŭładaŭ što da imion niemaŭlataŭ.
Pavodle słoŭ Merfita, baćkam, jakija chacieli, da prykładu, nazvać dzicio Sexy Fruit (Seksualny płod), Stallion (Žarabio) ci Fat Boy (Tłusty chłopiec), było admoŭlena ŭ rehistracyi imia.
Pry hetym, dzivicca sudździa, takija dziciačyja imiony jak Violence (Hvałt), Number 16 Bus Shelter (Prypynak aŭtobusu №16) i Benson and Hedges (nazva marki brytanskich cyharetaŭ) nie vyklikajuć nijakich narakańniaŭ z boku ŭładaŭ.
Kamientary