U vypusku tok-šou «Forum», što pakazali pa «Biełaruś—1» u paniadziełak uviečary, abmiarkoŭvali rakietny ŭdar ZŠA pa Siryi.
«My ŭ čarhovy raz ubačyli, što ni mižnarodnyja pahadnieńni, ni mižnarodnyja arhanizacyi nie pracujuć. Adbyłosia što: u parušeńnie ŭsich zakonaŭ, nasupierak rezalucyi Rady biaśpieki AAN, biez uzhadnieńnia ź niejkaj mižnarodnaj arhanizacyjaj, biez uzhadnieńnia z suvierennym uradam Siryi byli naniesienyja ŭdary kryłatymi rakietami! To bok pračnuŭsia prezident ZŠA, pryniaŭ rašeńnie i zrabiŭ! Heta strašna, tamu što heta viadzie naš śviet da katastrofy!», — skazaŭ namieśnik kiraŭnika Libieralna-demakratyčnaj partyi Aleh Hajdukievič.
«U Rasii niekatoryja palityki bilisia patylicaj ab stol ad radaści, što abrali Trampa. Ja zaŭsiody kazaŭ: vajennaja interviencyja dla ZŠA — heta zabieśpiačeńnie ich likvidnaści, heta vielmi vyhadny biznes, i jany ad hetaha nie admoviacca. I siońnia my bačym, što ŭ ZŠA finansava-palityčnaje łobi, jakoje hetuju palityku pravodzić, pieramahaje.
Što datyčyć Siryi: pakul nie pieradzielać Blizki Uschod, buduć vajavać. I pakul nie budzie druhoha centra siły, usie mižnarodnyja pahadnieńni nie buduć dziejničać», — praciahnuŭ Vadzim Baravik.
Jak bačym, u tok-šou na dziaržaŭnych kanałach zaprašajuć usio tych ža piersanažaŭ, što i letaś.
«Ranicaj, kali ja pračnułasia i ŭbačyła hetuju navinu, dla mianie heta nie było čymści niečakanym. I nikoli asabliva niečakanym nie budzie. Nasamreč usio było dastatkova prahnazavanym i raźličanym. Inšaja sprava, kali my budziem razvažać pra Blizki Uschod u schiemie dźviuch supierdziaržaŭ, to ničoha nie dabjomsia, — prakamientavała dacent fakulteta mižnarodnych adnosinaŭ BDU, kandydat histaryčnych navuk Roza Turarbiekava. — Tak, sapraŭdy, było vypuščana 59 «Tamahaŭkaŭ», była faktyčna źniščana vajskovaja infrastruktura. Ale ŭ Siryi siońnia idzie vajna. Vajna nosić nie tolki hramadzianski charaktar, jana źjaŭlajecca mižnarodnym kanfliktam. Tam na siońniašni dzień vajuje Iran, tam znachodziacca tureckija ŭzbrojenyja siły, jość rasijskaja vajskovaja prysutnaść».
Dahavaryć spadaryni Rozie nie daŭ Aleh Hajdukievič, jaki paraiŭ źviarnuć uvahu na toje, chto adrazu padtrymaŭ ZŠA. «Vialikabrytanija, Saudaŭskaja Aravija, Izrail — samyja levyja sajuźniki», — skazaŭ Hajdukievič.
«Ale samaje hałoŭnaje, što ZŠA tam padtrymlivajuć kurdy i siryjskaja apazicyja. Tamu zvodzić tolki da źniešnich siłaŭ nie varta», — zaŭvažyła spadarynia Turarbiekava.
«Siryja — heta adpracoŭka sistemy ŭzbrajeńnia, palityčnaj sistemy. Usie ŭzdychajuć na telešou ŭ Rasii: plaskajuć, nadzimajuć ščoki, Dziaržduma tam niešta zajaŭlaje, a što realna mohuć adkazać ZŠA? — znoŭ ustupiŭ u dyskusiju Baravik.
— Samaje niebiaśpiečnaje što? Što lubaja dziaržava, jakaja nie maje siońnia dachu, jadziernaha, stratehičnaha strymlivańnia, budzie padvierhnutaja takoj atacy».
«Vas nie biantežyć, što z 59 «Tamahaŭkaŭ» dalataje tolki 23? Zvyčajna vajskovyja ekśpierty kažuć, što kali padaje takaja rakieta, pavinna być vypalenaja ziamla», — skiravaŭ razmovu krychu ŭ inšy bok viadoŭca tok-šou Dźmitryj Bačkoŭ.
«Udar rychtavaŭsia vielmi chutka, nie było surjoznaj padrychtoŭki. Rašeńnie było pryniataje pa adnoj prostaj pryčynie: bačyli, što Asad pieramahaje. ZŠA pakazała, što nie dapuścić, kab Asad zastaŭsia prezidentam», — tut ža zreahavaŭ Hajdukievič.
«Ja dumaju, što hety ŭdar jakraz rychtavaŭsia, — uklučyŭsia ŭ dyskusiju palitołah, vykładčyk BNTU Alaksiej Bialajeŭ. — Patrebnaja była nahoda. Apošnim časam vielmi ŭzmacniŭsia ŭpłyŭ Rasii ŭ hetym rehijonie. My bačym ciapier miratvorčyja pracesy: i ŭ Ženievie pajšoŭ, i ŭ Astanie. Nasamreč siryjskaja armija chimičnaj zbrojaj nie vałodała, heta ŭžo dakazana. Byŭ udar siryjskaj avijacyi pa łabaratoryjach tych ža samych apazicyjanieraŭ, jakija rychtavali ŭ siabie chimičnuju zbroju, i paciarpieli jany z-za siabie. Pa sutnaści, užo viadoma, što ŭsio heta było padstrojena, bo paviedamleńni pra chimičnuju ataku siryjskich vojskaŭ byli raźmieščanyja tymi arhanizacyjami, jakija dapuščanyja na terytoryju, što kantraluje apazicyja, jašče za dzień, kali nijakaha ŭdaru nie było ŭ pryncypie. To bok była pravakacyja, jakuju vykarystali dla taho, kab u abychod usich pracedur, što isnujuć, nie pytajučysia Radu biaśpieki AAN, nanieści ŭdar».
Dahavaryć Bialajevu nie daŭ Hajdukievič.
«Nakont chimičnaj ataki. Pieršaje. Sapraŭdy, Bašar Asad byŭ samym apošnim čałaviekam, jaki byŭ zacikaŭleny ŭ vykarystańni chimičnaj zbroi paśla taho, jak jon staŭ pieramahać. Z čym niazhodny. Kali ja kažu, što nie rychtavaŭsia ŭdar, ja kažu nie pra toje, što nie rychtavalisia hetyja dziejańni ŭ Siryi. Tak, ZŠA pakazała, što zrobić usio, kab Bašar Asad syšoŭ. Ja kažu pra toje, što metaj bambardziroŭki rakiet było nie źniščeńnie. Heta pijar-akcyja. Voś tamu z 59 rakiet dalacieła 23», — dadaŭ Hajdukievič.
«Pytańnie «što heta było?» hučała nie tolki ŭ piatnicu, paśla taho, jak palacieli rakiety, ale i niekalkimi dniami raniej, kali źjavilisia kadry chimičnaj ataki. Niekatorym hetaha chapiła dla taho, kab pačać abvinavačvać Asada. Chtości abvinavačvaŭ Rasiju, chtości šukaŭ, kamu heta vyhadna, niekatoryja pastavili pad sumnieŭ, što takoje ŭvohule było», — padkinuŭ temu dla abmierkavańnia viadoŭca.
«Što zasłuhoŭvaje asudžeńnia, toje, što amierykancy ździejśnili akt mižnarodnaha chulihanstva i ŭ parušeńnie ŭsich pravavych norm prymianili vajskovuju siłu. I dla mianie hetaja situacyja, darečy, nie novaja. Bo Amieryka, pa sutnaści, viartajecca ŭ epochu Buša-małodšaha. 2003 hod, Irak — taja ž historyja, — skazaŭ hramadski i palityčny dziejač Siarhiej Vaźniak. —
To bok my ciapier atrymlivajem novuju paviestku suśvietnaj palityki, kali buduć ihnaravacca mižnarodnyja normy dźviuma jadziernymi dziaržavami, dvuma pastajannymi siabrami Rady biaśpieki AAN. Heta samaje strašnaje, što adbyłosia».
«Voś my pačynajem z vami raźbirać, była chimataka ci nie była, — uziaŭ słova Baravik. — Vy davajcie patłumačcie nasielnictvu, nie pravodziačy rasśledavańnie, pa rolikach ź jutuba, što adbyłosia. Nočču było pryniataje rašeńnie ab naniasieńni ŭdaraŭ pa niezaležnaj dziaržavie ŭ parušeńnie ŭsich patrabavańniaŭ AAN. Siońnia možna skazać, što ŭ peŭnych krainach padcirajucca ŭsimi pałažeńniami Rady biaśpieki AAN. Druhoje. Amierykancy z kanca XX stahodździa nie pierastajuć vieści bajavyja dziejańni ŭ śviecie. U Rasii, na žal, usie dziejańni siońnia zroblenyja ŭ adkaz. Pahladzicie na reakcyju Izraila. 150 miljardaŭ dalaraŭ amierykancy adściahnuli Izrailu za apošnija hady tolki na padtrymku armii i ich niezaležnaści ŭ rehijonie. Siońnia Izrail luboje dziejańnie ZŠA padtrymlivaje».
Kali słova dali pradstaŭniku siryjskaj dyjaspary Ajmanu Abazachu, toj vykazaŭ dumku, što rasśledavańnie, chto vykarystoŭvaŭ chimičnuju zbroju, nie było praviedzienaje, bo Amieryka bajałasia vynikaŭ. Abazach dadaŭ, što, imavierna, ZŠA płanavali ataku i tamu vielmi chutka pryniali rašeńnie. Jon taksama skazaŭ, što jak ni sprabavała Francyja ci lubaja kraina śvietu padzialić Siryju pavodle relihii, u ich ničoha nie atrymałasia.
«Ja ździŭlajusia vam, spadarstva. Jak vy ŭ svoj čas pavieryli ŭ toje, što Tramp moža być sajuźnikam Rasii, što jon moža vieści siabie inakš? Čamu chtości ličyŭ, što jon budzie zajmacca tolki ŭnutrypalityčnymi prablemami, prosta zachaplalisia im? Kali jany ŭžo praź miesiac ź nievialikim vystupili z prapanovaj ab pavieličeńni vajennaha biudžetu na 56 miljardaŭ, ab skaračeńni finansavańnia dziaržaŭnaha departamienta na tracinu. Ja dumaju, što heta samo za siabie havoryć, na jakija instrumienty budzie apora. Druhoje. Ja chacieła paraŭnać z prezidenctvam Abamy. Usie tut jaho łajali. My z vami ŭzhadajem jaho jašče nie raz i dobrym słovam, tamu što, u adroźnieńnie ad Trampa, jon pavažaje zakon Amieryki, jon źviartaŭsia da Kanhresu ZŠA z pytańniem ab bambardziroŭcy Siryi. I ŭ Kanhresie vystupili suprać», — skazała Roza Turarbiekava.
U druhoj častcy prahramy abmierkavańnie skancentravałasia vakoł asoby Trampa.
«Trampa ja b rascaniŭ jak słana ŭ pasudnaj łaŭcy. Tamu što jon pryjšoŭ na toje pole, jakoje ŭžo było zaminiravana jaho papiarednikami, nie majučy vyraznaj stratehii i vyraznaha hieapalityčnaha razumieńnia. Dla jaho Pucin na pieradvybarčaj kampanii byŭ «dobrym chłopcam», ź jakim možna mieć spravu. Ale kali jon pryjšoŭ da ŭłady, to pajšoŭ na pavadku svajho bližejšaha akružeńnia.
Pa sutnaści, amierykancy zajmajucca hienacydam: źniščajuć horad pry dapamozie avijacyi. Chacia Rasija, naprykład, pry šturmie Alepa avijacyju nie vykarystoŭvała. I siryjskija vojski nie vykarystoŭvali, a ich sprabujuć u hetym abvinavacić. Voś hetyja dziejańni Trampa, a ja skažu, što hety čałaviek nie kampietentny, pasprabavaŭ pryniać pieršaje rašeńnie, što pryjšło jamu ŭ hałavu, biez anijakich padstaŭ», — prakamientavaŭ palitołah Alaksiej Bialajeŭ.
«Ja chaču źviarnuć uvahu na toje, što Tramp — amierykaniec. I viadzie siabie pa-amierykansku, tamu što luby amierykaniec ličyć, što treba spačatku hałavu adsiekčy, a potym dumać, što z hetym zrabić. Jon tak i robić. Pa-druhoje, Tramp niesistemny čałaviek. Jon sam pa sabie i prymaje rašeńni emacyjna. Bačna, što rašeńnie było niepadrychtavanym. Rakiety nie ŭsie dalacieli, trapili nie tudy», — adznačyŭ zahadčyk kafiedry movaznaŭstva i krainaznaŭstva Uschodu fakulteta mižnarodnych adnosinaŭ BDU Alaksandr Hardziej.
Padčas padsumavańnia Hajdukievič i Baravik adznačyli, što Biełarusi ciapier varta samim kłapacicca pra svoj suvierenitet i ni na kaho nie spadziavacca, a biełaruskamu MZS — vieści tonkuju, ale vyraznuju źniešniepalityčnuju liniju.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary