U Vialikabrytanii vynajšli razumny bint, jaki dasyłaje infarmacyju pra ranu doktaru
Navukoŭcy z Univiersiteta Suonsi (Uels, Vialikabrytanija) raspracavali inavacyjny bint, jaki adsočvaje praces lačeńnia rany i dasyłaje ŭsiu infarmacyju adrazu na kampjutar lekara, paviedamlaje BBC.
Razumny bint budzie nazirać, jak zahojvajecca rana, a taksama sačyć za ruchalnaj aktyŭnaściu pacyjenta. Čakajecca, što takuju pryładu možna budzie vykarystoŭvać paŭsiudna paśla razhortvańnia sietki suviazi piataha pakaleńnia 5G.
Inavacyjny bint vykarystoŭvaje nanatechnałohii dla analizu stanu rany, kab lekar na asnovie hetaj infarmacyi moh karektavać lačeńnie. Taki padychod značna palapšaje reabilitacyju.
Prafiesar Mark Klemient, jaki zajmaŭsia raspracoŭkaj razumnaha bintu, zaŭvažyŭ: «U tradycyjnaj miedycynie lekar ahladaje pacyjenta, a potym prapisvaje jamu praceduru lačeńnia na niekalki miesiacaŭ napierad. I pry hetym nie ŭličvajecca, što stan zdaroŭja moža źmianiacca».
Taksama prafiesar źviarnuŭ uvahu i na psichałahičnyja asablivaści pracesu lačeńnia: «Časam my tak mocna pavažajem doktara, što kažam jamu, jak usio dobra, navat kali heta nie tak. Miedycynskija technałohii razam z pakaleńniem suviazi 5G vyrašać hetuju prablemu».
Maleńkija sensary dla bintu płanujecca vyrablać na 3D-pryntarach, što značna skarocić vydatki na vytvorčaść. Vyprabavańni razumnaha bintu buduć praciahvacca najbližejšyja 12 miesiacaŭ.
Kamientary