Ranicaj 17 krasavika pablizu dziciačaha łahiera «Biełyja rosy», dzie ciapier mieścicca licej MUS, supracoŭniki ABEZ Minskaha RUUS zatrymali 57-hadovuju žycharku Łahojska i 59-hadovuju minčanku, paviedamili ŭ pres-słužbie MUS.
Žančyny pracujuć povaram i pasudamyjkaj zhodna z damovaj, zaklučanaj licejem MUS z UP «Kambinat školnaha charčavańnia Partyzanskaha rajona Minska».
Pry ahladzie ich pakietaŭ apieratyŭniki znajšli vykradzienyja pradukty charčavańnia: miasny farš, syr, śmiatanu, śmietankovaje masła i raślinny alej, čaj, majanez i sadavinu.
«Pastupiła apieratyŭnaja infarmacyja ab tym, što navučencam liceja vydajuć charčovy paj nižej za patrebnuju normu, — raspavioŭ načalnik ABEZ Minskaha RUUS Hieorhij Kulikoŭski. — My nie mahli ŭ heta pavieryć, bo ŭ licei navučajucca i siroty, i dzieci, jakija zastalisia biez apieki baćkoŭ, i vychadcy z šmatdzietnych siemjaŭ. Kraści ŭ ich ježu, pa mienšaj miery, amaralna. Pakinuć infarmacyju biez uvahi my nie mahli. Na žal, u vyniku apieratyŭna-vyšukovych mierapryjemstvaŭ źviestki paćvierdzilisia, što i stała padstavaj dla rejdu pa vyjaŭleńni pravaparušalnikaŭ».
Paśla zatrymańnia padazravanyja dali pryznalnyja pakazańni i pakajalisia ŭ zroblenym. U ich dačynieńni składzienyja administracyjnyja pratakoły pa č. 1 art. 10.5 KoAP Biełarusi («Drobny kradziež»). Maksimalnaje pakarańnie pa dadzienym artykule praduhledžvaje štraf u pamiery 30 bazavych vieličyń albo administracyjny aryšt.
Vykradzienyja pradukty viernutyja ŭ licej.
«Taksama ŭ adras pracadaŭcy žančyn budzie vyniesienaje pradstaŭleńnie ab likvidacyi pryčyn i ŭmoŭ, jakija spryjajuć ździajśnieńniu pravaparušeńniaŭ. Heta, u svaju čarhu, paŭpłyvaje na rašeńnie ab dalejšym padaŭžeńni abo spynieńni pracoŭnych adnosin», — adznačyli ŭ MUS.
