Płan na vychodnyja: top-5 śpiektaklaŭ, jakija varta pahladzieć na minskim forumie vuličnych teatraŭ
Karnavalnaje šeście, šmat tancaŭ, chadulisty, interaktyŭ i kłaŭnada — jakim budzie hałoŭny vuličny fiestyval stalicy ŭ hetym hodzie, što projdzie ŭ Vierchnim horadzie 7-8 maja?
Pieršy forum vuličnych teatraŭ adbyŭsia ŭ Minsku ŭ 2013-m. Pastupova jon pieratvaraŭsia va ŭsio bolš jarkuju i nasyčanuju haradskuju padzieju.
«Kali paraŭnoŭvać ź minułymi hadami, zaraz nas čakaje jašče bolš nasyčanaja prahrama: kala 200 udzielnikaŭ, šmat cyrkavych i kłoŭnskich numaroŭ. Pačniecca ŭsio maštabnym karnavalnym šeściem: 7 maja u 12.00 usie akciory startujuć z Kastryčnickaj płoščy i razam projducca da płoščy Svabody — na hety čas u horadzie śpiecyjalna pierakryjuć ruch aŭto», — raspavioŭ «NN» art-dyrektar Uładzimir Hałak.
A ciapier trochi padrabiaźniej.
«Bilinhvy. Brest» teatra «Nasuprać»
Bresckija artysty praciahvajuć «fłešmob» pa zboru mierkavańniaŭ nakont situacyi z dvuchmoŭjem u našaj krainie, raspačaty ŭ Minsku režysioram Andrejem Saŭčanka. Heta dakumientalnaja pastanoŭka, bo ŭ jaje ŭvajšli manałohi sapraŭdnych žycharoŭ Bresta. «Chto ja taki pamiž dźviuch moŭ?» — mienavita takim pytańniem zadajecca hałoŭny akcior i prapanuje parazvažać razam ź im.
«Stop! Źniata!» teatra «Mustaš» (Minsk)
Teatr «Mustaš» nieadnarazova zachoplivaŭ biełaruskija vulicy to ŭ vobrazach inšapłanietnikaŭ, to ŭ jakaści paštavikoŭ. U svajoj apošniaj tvorčaj pracy vusatyja akciory zaprašajuć hledačoŭ paŭdzielničać u zdymkach sapraŭdnaha filma, hałoŭnaj zorkaj jakoha moža stać luby prachožy! Kali maryli trapić u kino i apynucca na zdymačnaj placoŭcy — abaviazkova prychodźcie.
«Katastrofa show» ad italjanskaha kłoŭna Katastrofa
Andrea Fiedzi horača lubiać dzieci i darosłyja nie tolki za toje, što jon admočvaje kłasnyja fokusy i daskanała vałodaje majsterstvam vydzimańnia mylnych burbałak, ale i za mahčymaść pavalać durnia biez nastupstvaŭ. U Minsku tempieramientny i haračy italjaniec abiacaje zładzić razam z hledačami na płoščy Svabody baksiorski pajadynak za dziaŭčynu mary.
«Pinezkologia» polskaha teatra «Pinezka»
Praciahvaje temu kłaŭnady teatr «Pinezka» z Hdańska. Ich sumieś pantamimy, tanca, akrabatyki, masak, maryjanietak, žanhliravańnia i impravizacyi z aŭdytoryjaj dapamoža pryhadać śvietłyja i radasnyja emocyi ź dziacinstva. Cudoŭnaje siamiejnaje vidovišča, jakoje abiacaje vylečyć nie tolki ad bojazi kłoŭnaŭ, ale i ad sumnaha nastroju.
«Papiarovyja ludzi» teatra «Koła» (Viciebsk)
Voś užo bolš 10 hadoŭ moładzievy teatr z paŭnočnaha ŭschodu Biełarusi, jaki byŭ zasnavany naŭprost na bazie studyi akciorskaha majsterstva VDU im. Mašerava, stvaraje tam niepaŭtornuju ekśpierymientalnuju prastoru, padymaje važnyja sacyjalnyja i psichałahičnyja temy.
Śpiektakl «Papiarovyja ludzi» pra toje, jak składana inšy raz dasiahnuć uzajemarazumieńnia ŭ kalektyvie. U im adsutničajuć słovy, ale samaje hałoŭnaje ŭ žyćci, jak viadoma, vyjaŭlajecca nie imi.
Z poŭnaj prahramaj foruma možna paznajomicca tut.
-
U Homielskim dramatyčnym teatry — kadravyja čystki. Znoŭ praz «palityku»
-
«Budzie śmiešna i baluča»: «Kupałaŭcy» prezientujuć zaŭtra novy śpiektakl. U hałoŭnych rolach — Manajeŭ, Biełachvościk, Harcujeva
-
«Rašeńnie pryjšło zvonku». Što adbyvajecca ŭ viciebskim teatry, dzie ŭ śpiektakli prahučała «Žyvie Fłandryja!» i pačałasia čarada zvalnieńniaŭ?
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža30
Kamientary