Ivan Naskievič pabuduje dom u «Drazdach-2», choć užo zajmieŭ ilhotny katedž u Pinsku
Staršynia Śledčaha kamiteta Ivan Naskievič rychtujecca stać novym žycharom «Drazdoŭ-2». Prava pabudavać elitny katedž na ŭskrajku Minska hałoŭny śledčy krainy atrymaŭ pavodle rašeńnia Minharvykankama ad 25 listapada 2016 hoda №3517 «dla słužbovaha karystańnia».
Zdavałasia b, zvyčajnaja historyja — bolš za 100 pradstaŭnikoŭ łukašenkaŭskaj elity atrymali takija ž učastki. Ale vypadak Naskieviča nietypovy adrazu pa niekalkich pakazčykach.
Naskievič budujecca pa čarzie na palapšeńnie žyllovych umovaŭ jak šmatdzietny baćka
«Naša Niva» ŭžo raskazvała historyju žyćcia čynoŭnika. Nahadajem, što ŭ jaho z žonkaj Irynaj čaćviora dziaciej. U suviazi z hetym Naskievičy mieli prava stać u Minsku ŭ čarhu na žyllo dla šmatdzietnych siemjaŭ. Hety śpis ruchajecca adnosna chutka i dazvalaje pretendavać, prykładam, na kvateru ŭ panelnym domie ŭ Kamiennaj Horcy.
Adnak Naskievič patrapiŭ u «śpiecčarhu». Pavodle dadzienych na sajcie Minharvykankama, u asobnym śpisie Centralnaha rajona jon znachodzicca na 2 miescy. Kiraŭnica Administracyi prezidenta Natalla Kačanava stajała ŭ čarzie adrazu ŭśled za im, pad numaram 3.
Učastak vydadzieny va ŭłasnaść
Na praciahu apošnich hadoŭ top-čynoŭniki atrymlivali svaje elitnyja ŭčastki nie va ŭłasnaść, a pa pravie pažyćciovaha spadčynnaha vałodańnia. Haspadarom ziamli farmalna zastavałasia dziaržava. Naskievič ža ŭžo staŭ paŭnavartasnym ułaśnikam svaich 15 sotak.
U dakumiencie na vydzialeńnie ziamli paznačana, što na praciahu 8 hadoŭ ad momantu rehistracyi doma jon nie zmoža pradać svoj katedž.
Ci atrymaŭ Naskievič kredyt na budaŭnictva doma, nieviadoma, adnak u dakumientach niekalki razoŭ zhadvajucca normy zakona, jakija, u pryncypie, praduhledžvajuć pryciahnieńnie lhotnych srodkaŭ.
Druhi katedž Naskievičaŭ
Pikantnaści situacyi dadaje toj fakt, što ŭ siaredzinie 2000-ch siamja Ivana Naskieviča ŭžo budavała lhotny katedž! Dom znachodzicca ŭ pinskim rajonie Žyłharadok, heta svojeasablivyja miascovyja «Drazdy». U hetym paleskim horadzie Naskievič uznačalvaŭ rajonnuju prakuraturu.
«Naprykład, najbližejšy susied Naskieviča — Michaił Samałazaŭ, pieršy namieśnik staršyni Pinskaha harvykankama. A praz darohu žyvie samy bahaty pinčuk — jak kaža pahałoska, miljanier — Viktar Lemiašeŭski, jaki vałodaje adrazu dvuma elitnymi ŭčastkami», — adznačała «NN» u papiarednim repartažy.
Na budaŭnictva katedža Naskievičy ŭziali $10 tysiač u ekvivalencie. Hrošy treba spłacić da 2027 hoda, ale ŭžo pa ciapierašnim kursie ahulnaja suma «ŭsochła» za košt devalvacyj da $1150.
* * *
Čytajcie taksama. Cierabličy: repartaž z radzimy novaha kiraŭnika Śledčaha kamiteta i raspovied pra jahonuju siamju FOTY
Čytajcie taksama: Ad Abielskaj da Jarmošynaj: 112 uładalnikaŭ katedžaŭ u Drazdach, poŭny śpis
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary