U Mahilovie aktyvistu AHP prysudzili 15 sutak za akcyju, jakoj nie było
Leninski sud Mahilova pakaraŭ 15 sutkami administracyjnaha aryštu aktyvista Abjadnanaj hramadzianskaj partyi Ramana Miščanku. Jaho pryznali vinavatym u arhanizacyi niesankcyjanavanaj akcyi na płoščy Lenina. Pavodle vyraku sudździ Aksany Ratnikavaj, aktyvist raspaŭsiudziŭ praz sacyjalnyja sietki ŭ internecie zaklik da ŭdziełu 1 traŭnia ŭ Maršy Salidarnaści, nia majučy dazvołu ŭłady.
Raman Miščanka svajoj viny nie pryznaŭ. Zajaviŭ, što prava na praviadzieńnie mirnych schodaŭ, mitynhaŭ dy šeściaŭ harantujecca Kanstytucyjaj. Vyrak sudździ Ratnikavaj dla jaho byŭ čakany.
«Što ja mahu skazać? Hańba hetamu sudu. Ja čakaŭ, što mnie budzie 15 sutak aryštu», — prakamentavaŭ prysud Raman Miščanka.
Marš Salidarnaści, za raspaŭsiud infarmacyi pra jaki asudzili aktyvista, nie adbyŭsia. U dzień jaho praviadzieńnia Miščanku zatrymali i zavieźli ŭ vyćviareźnik, dzie pratrymali bolš za 5 hadzin. Supracoŭnik vyćviareźnika zajaŭlaŭ žurnalistaŭ i pravaabaroncam, što Miščanka pjany i śpić. U jaho arhaniźmie — 1,28 pramile alkaholu.
Chłopiec abviarhaje abvinavačvańni ŭ alkaholnym apjanieńni. Kaža, što nie ŭžyvaŭ alkaholu. Pavodle jaho, praź piać hadzin alkatest pakazaŭ nulavy ŭzrovień apjanieńnia. U materyjałach spravy nia zhadvajecca vyćviareźnik, a tolki «arhanizacyja masavaha mierapryjemstva».
«Vyćviareźnik — heta novaja forma preventyŭnaha zatrymańnia, kab nie dapuścić arhanizatara na miesca praviadzieńnia akcyi pratestu», — kazaŭ da vyniasieńnia vyraku Raman Miščanka.
Z vyćviareźnika ŭ adździeł milicyi, pavodle aktyvista, jaho vieźli major i padpałkoŭnik.
Siońnia z rajadździełu jaho dastavili ŭ sud dva majory. Pravaabaroncy kažuć, što pryvieźli aktyvista tajemna, u čas pierapynku na abied. «Vypadkova ŭhledzieli, jak jaho zavodziać u budynak», — skazaŭ pravaabaronca Barys Buchiel.
«Na imia staršyni Leninskaha sudu Haliny Kužalevaj napisanaja skarha pra niedapuščalnaść vykarystańnia sudom praktyki tajemnych pracesaŭ, što supiarečyć zakanadaŭstvu, — skazaŭ pravaabaronca. — U abvinavačanaha nie było mahčymaści pahutaryć z pravaabaroncami, kab abmierkavać svaje pavodziny na pracesie. Takim čynam było parušanaje prava abvinavačanaha na abaronu ».
-
«Baimsia, što jaje nie vypuściać ź Biełarusi». Baćki minskich padletkaŭ raskazali, jak škoły kantralujuć płany pastupleńnia ich dziaciej
-
«Čałaviek, zaniaty lubimaj spravaj, nie stareje». Biełarus robić u Polščy rycarskija daśpiechi pa 15 tysiač jeŭra
-
«Zachvareŭ? Idzi ŭ chram». Andrej Lemiašonak raskazaŭ, jak zaražaŭ ludziej na Vialikdzień 2020 hoda
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary