U noč pierad zabojstvam žurnalista Paŭła Šaramieta 20 lipienia kala jaho doma znachodziŭsia čałaviek pa imieni Ihar Uścimienka, jaki byŭ u minułym supracoŭnikam Słužby biaśpieki Ukrainy. Pra heta havorycca ŭ filmie-rasśledavańni Centra pa daśledavańni karupcyi i arhanizavanaj złačynnaści (OCCRP) i redakcyi rasśledavańniaŭ «Hromadśkie» «Ślidstvo.Info»
Jak vyśvietlili žurnalisty, u noč, kali złačyncy zakłali bombu pad aŭtamabil Šaramieta, niedaloka ad jaho doma adnačasova spynilisia «Škoda» i «Mersedes»; ludzi z abiedźviuch mašyn znachodzilisia tam niekalki hadzin, pieryjadyčna kantaktujučy adzin z adnym, a nieŭzabavie paśla zakładki bomby źjechali.
Člen daśledčaj kamandy Bellingcat apracavaŭ videa z kamier videanazirańnia i vyśvietliŭ numar «Škody». Mašyna była zarehistravanaja na žančynu pa imieni Natalla Zareckaja. Śpiarša jana advierhła suviaź z aŭtamabilem, adnak paźniej paviedamiła OCCRP, što zarehistravała mašynu na svajo imia pa prośbie čałavieka pa imieni Ihar Uścimienka.
Uścimienka na sustrečy z žurnalistami pryznaŭ, što byŭ kala doma Šaramieta. Jak vynikaje ź filma, jon raspavioŭ, što akazvaŭ tam «pryvatnyja pasłuhi», źviazanyja z nazirańniem za niepaŭnaletnimi.
Krynicy ŭ SBU paviedamili aŭtaram rasśledavańnia, što ŭ 2014 hodzie Uścimienka byŭ supracoŭnikam viedamstva. Sam jon suviaź ź viedamstvam nie paćvierdziŭ.
Pa dadzienych OCCRP, u śledstva była infarmacyja ab «Škodzie», jakaja prastajała kala doma Šaramieta niekalki hadzin u noč pierad zabojstvam, adnak palicyja nie dapytała ni Uścimienku, ni ŭładalnicu mašyny.
U Słužbie biaśpieki Ukrainy zajavili, što były supracoŭnik struktury, zaŭvažany ŭ časie sačeńnia za domam, dzie žyŭ Šaramiet, pierad zabojstvam apošniaha, byŭ zvolnieny sa svajoj pasady ŭ viedamstvie 29 krasavika 2014 hoda.
Nahadajem, što heta byŭ momant, kali Rasija zachapiła Danbas i ažyćciaŭlała apieracyi pa zachopie Adesy i Charkava, jakija Ukrainie ŭdasca sarvać.
Zvalnieńnie 29 krasavika aznačaje, što toj čałaviek byŭ padaŭ na zvalnieńnie raniej — paśla pieramohi Majdanu i anieksii Kryma.
Čytajcie taksama: Poŭny tekst rasśledavańnia Killing Pavel
«Paviedamlajem, što Uścimienka Ihar Andrejevič byŭ zvolnieny z SB Ukrainy 29 krasavika 2014 hoda, — paviedamiła pres-sakratarka SBU Alena Hitlanskaja. — Kali b žurnalisty źviarnulisia da nas z zapytam pra pana Uścimienka nie paśla vychadu prahramy ŭ efir, a da jaje, mahčyma, nie było b pra što havaryć», — napisała jana ŭ fejsbuku.