Lidery Polščy, Ukrainy, Litvy, Estoni i Łatvii prybyli ŭ Tbilisi, vystupili na masavym mitynhu. Prezydent Polščy ŭ emacyjnaj pramovie: Našy susiedzi pakazali svoj tvar, jaki nam sotni hod viadomy. Jany ličać, što narody vakoł ich pavinny im padparadkoŭvacca. My tut, kab pakazać, u tym liku i Eŭrasajuzu, što z Centralnaj Eŭropaj, z Hruzijaj, tre budzie ličycca, što my subjekt palityki.
«My tut — kiraŭniki piaci dziaržavaŭ: Polščy, Ukrainy, Litvy, Łatvii i Estonii. My tut, kab pryniać boj, — zajaviŭ na masavym mitynhu ŭ Tbilisi prezydent Polščy Lech Kačynski. — Siońnia — Hruzija, a zaŭtra na jaje miescy moža akazacca Ŭkraina, a paśla i čarha Polščy moža nadyści»,
U svajoj emacyjnaj pramovie jon skazaŭ:
«Pieršy raz za doŭhi čas našy susiedzi pakazali svoj tvar, jaki nam sotni hod viadomy. Hetyja susiedzi ličać, što narody vakoł ich pavinny im padparadkoŭvacca. My kažam «nie».
Kačynski praciahvaŭ: «taja kraina ličyć, što daŭnija časy imperyi viartajucca, što znoŭ panavańnie budzie rysaj našaha rehijonu. Nia budzie. Tyja časy skončylisia raz i nazaŭždy. Nie na 20, 30 ci 50 hadoŭ, jak niekatoryja dumajuć — nazaŭždy».
Kačynski nahadaŭ, što praz toje panavańnie prajšli ŭsie narody Ŭschodniaj Eŭropy adnačasova. I heta było niaščaście dla narodaŭ, zajaviŭ jon.
Jon acharaktaryzavaŭ dziejańni Rasiei jak łamańnie ludzkich charaktaraŭ, naviazvańnie čužynskaha ładu, naviazvańnie svajoj movy.
«Siońnia my tut razam. Siońnia śviet musiŭ zreahavać, navat kali nie chacieŭ taje reakcyi. My tut, kab śviet zreahavaŭ jašče macniej — asabliva Eŭrapiejski Sajuz i NATO — zajaviŭ lider Polščy.
Jon pryznaŭ, što kali inicyjavaŭ prylot kiraŭnikoŭ krainaŭ rehijonu ŭ Tbilisi «sioj-toj dumaŭ, što prezydenty buduć bajacca. Nichto nie zbajaŭsia, usie pryjechali, bo ŭ Centralnaj Eŭropie śmiełyja lidery.
Chacieŭ by zajavić nia tolki vam tut, ale i Eŭrapiejskamu Sajuzu, što z Centralnaj Eŭropaj, z Hruzijaj, z usim našym rehijonam tre budzie ličycca, što my subjekt, a nie abjekt palityki».Na dumku Kačynskaha, pierakanańnie, što prynaležnaść da ES i NATO pakładzie kaniec rasiejskim apetytam, heta pamyłka. Ale, zajaviŭ jon, «my zdolejem tamu procistajać». «Kali eŭrapiejskija kaštoŭnaści heta nie pustoje słova, to cełaja Eŭropa pavinna tut być siońnia», — skazaŭ jon. Jon nahadaŭ, što ŭ Tbilisi siońnia prysutničaje i prezydent Sarkazi.
Vystup prezydenta Ŭkrainy Juščanki byŭ bolš strymanym: «Darahija hruzinskija siabry, svaboda vartaja taho, kab za jaje zmahacca... Hruzinskaja nacyja dastojnaja być niezaležnaju». «Vy nikoli nia budziecie adny, nas miljony», — zajaviŭ jon.
150-tysiačny mitiynh u adkaz skandavaŭ nazvy krainaŭ i imiony prezydentaŭ.
Pradstaŭniki ŭradu Polščy, u tym liku ministar zamiežnych spravaŭ, jakija naležać da procilehłaha z prezydentam palityčnaha stanu, asudzili zajavy Lecha Kačynskaha jak antyrasiejskija.
Lidery Litvy, Polščy, Ukrainy, Estoni i Łatvii prybyli ŭ Tbilisi ŭ aŭtorak uviečary. Jany lacieli polskim uradavym samalotam praz Krym, dzie da ich dałučylisia Juščanka i žonka Saakašvili, jakaja viartałasia kružnym šlacham na radzimu z Kitaju — samaloty ŭ Tbilisi nia lotajuć praz vajnu. Prezydenty zrabili pasadku ŭ Hiandžy (Azerbajdžan), bo pasadka ŭ Tbilisi nie była biaśpiečnaju. Tym časam małyja dzieci Micheiła Saakašvili vyjechali na adpačynak u Krym.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary