U Brasłavie adkryli dziciačuju parusnuju škołu: u prajekt užo ŭkłali kala sta tysiač jeŭra. Naścia Chrapan adna z 18 miascovych chłopčykaŭ i dziaŭčynak, jakija pieršymi vučacca spraŭlacca z novieńkimi jachtami. Heta kruta, apisvaje emocyi ad zaniatkaŭ dziaŭčynka i nie chavaje: «Mnie jašče treniravacca i treniravacca. Asabliva składana ŭtrymać vietraź na pavarotach: možna paprostu zvalicca ŭ vadu. A ja padać nie chaču, bo ja nie ŭmieju płavać».
Fota: Volha Šukajła, TUT.BY
Zrešty, być płyvuńniaj u parusnym sporcie nie abaviazkova: na Naści vyratavalnaja kamizelka. Dapamoža, kali što.
Na voziery Dryviaty zaraz pryšvartavanyja 15 novieńkich jacht kłasa «Aptymist». Tut ža pirs, kab da ich spuskacca, i anhar, dzie ich zachoŭvać. Usio heta źjaviłasia ŭ Brasłavie dziakujučy polskim dypłamatam u ramkach prajekta «Polskaja dapamoha».
Fota: Volha Šukajła, TUT.BY
— Za apošnija dziesiać hadoŭ my realizavali ŭ Biełarusi kala sta prajektaŭ małych hrantaŭ, — adznačyŭ Konrad Paŭlik, Nadzvyčajny i Paŭnamocny pasoł Respubliki Polšča ŭ Biełarusi. — Vietraznaja škoła — asablivy ź ich. Jon pieravyšaje maštab małych hrantaŭ, i jaho košt prykładna 100 tysiač jeŭra.
Nadzvyčajny i Paŭnamocny pasoł Respubliki Polšča ŭ Biełarusi Konrad Paŭlik, staršynia Brasłaŭskaha rajvykankama Uładzimir Dranieŭski i staršynia Viciebskaha abłvykankama Mikałaj Šarstnioŭ. Fota: Volha Šukajła, TUT.BY
Jašče 40 tysiač jeŭra Polšča invieściruje ŭ pracu škoły. Naprykład, navučańnie instruktaraŭ.
«Tut by navučycca łavić chvalu i nie bajacca»
Ideja stvaryć u Brasłavie dziciačuju parusnuju škołu źjaviłasia bolš za hod tamu. Choć na samaj spravie jachtynh dla hetaha miesca paniaćcie nie novaje. Jašče ŭ 1930-ja hady ŭ horadzie pabudavali try prystani, dzie raźmiaščalisia paruśniki, łodki i bajdarki. Tut pravodzili štohadovyja rehaty. Adnak Druhaja suśvietnaja vajna pierapyniła tradycyju. I tolki ŭ 2012 hodzie tut znoŭ stali prachodzić honki parusnych spartyŭnych sudoŭ.
Ale ŭznaharody dla junych jachtsmienaŭ ciapier nie hałoŭnaje.
Fota: Volha Šukajła, TUT.BY
— Tut by navučycca łavić chvalu, — dzielicca płanami na najbližejšyja treniroŭki Tania Kałabuchava. — I jašče — nie bajacca, a to mocny viecier časam vielmi pałochaje.
Pad vietrazi 11-hadovaja vučanica himnazii №1 trapiła z turystyčnaha hurtka. Prapanavaŭ kiraŭnik Viačasłaŭ Krop. Kiravać jachtaj jon navučyŭsia ŭ Polščy i navat atrymaŭ na sudna pravy.
Fota: Volha Šukajła, TUT.BY
— Hadoŭ šeść tamu padčas turystyčnaha łahiera «Brasłaŭskija vietrazi» našy polskija siabry i kalehi pryvieźli nam aprabavać dva «Aptymisty», — uspaminaje Viačasłaŭ Krop. — Dzieciam vielmi spadabałasia. «Voś by i nam takija», — maryli my tady, i ŭsio spraŭdziłasia.
Ciapier, kaža surazmoŭca, jachtavym sportam u horadzie zajmajucca kala 20 chłopčykaŭ i dziaŭčynak. Užo miesiac jany vučać teoryju, i tydzień chodziać pad vietraziem pa vadzie. Za hety čas, što cikava, nichto z pačatkoŭcaŭ ŭ vadu navat nie ŭpaŭ.
— Spryt, — uśmichajecca Viačasłaŭ Krop.
«A jak nam zapisać dzicia ŭ parusnuju škołu?»
A ŭ adździeł adukacyi sportu i turyzmu Brasłaŭskaha rajvykankama ŭžo katory dzień telefanujuć baćki. Pytańnie ŭ mam i tat takoje: «A jak nam zapisać dzicia ŭ parusnuju škołu?».
— Ciapier my šukajem prafiesijnaha treniera pa parusnym sporcie i niedzie praź miesiac płanujem nabrać try hrupy dziaciej, — kaža Stanisłaŭ Astanoŭka, namieśnik načalnika adździeła adukacyi, sportu i turyzmu Brasłaŭskaha rajvykankama. — Kožnaja z hrup da 15 čałaviek, zaniatki dla chłopčykaŭ i dziaŭčynak buduć biaspłatnymi.
Prafiesijnaha instruktara pa parusnym sporcie, nie chavaje surazmoŭca, znajści nie tak i prosta. Usio ž taki hety sport u krainie nie vielmi raźvity.
Fota: Volha Šukajła, TUT.BY
— Anałahičnaja škoła daŭno isnuje ŭ polskim horadzie Aŭhustovie. Tudy na pierakvalifikacyju płanujem adpravić niekalki našych śpiecyjalistaŭ, — praciahvaje Stanisłaŭ Astanoŭka. — Mahčyma, ich instruktar pryjedzie da nas i navučyć kahości tut.
Što tyčycca jacht-kłuba dla darosłych, to pra jaho źjaŭleńnie ŭ Brasłavie pakul havaryć nie biarucca. Zatoje ŭ płanach vučyć parusnamu sportu dziaciej miascovych turystaŭ. Praŭda, u adroźnieńnie ad miascovych dzietak, zaniatki dla chłopčykaŭ i dziaŭčynak, jakija adpačyvajuć na aziorach, buduć płatnymi.
