Makiej nie paćvierdziŭ, što šenhienskija vizy patańniejuć z 2018 hoda
Ministr zamiežnych spraŭ Uładzimir Makiej nie moža paćvierdzić patanieńnie šenhienskich vizaŭ z 1 studzienia 2018 hoda. Pra heta jon zajaviŭ na mižnarodnaj kanfierencyi «Minski dyjałoh».
«Ja nie mahu skazać pra patanieńnie šenhienskich vizaŭ dla biełarusaŭ z novaha hoda, — paviedamiŭ žurnalistam Uładzimir Makiej. — Vy źviarniciesia da tych kalehaŭ, jakija robiać zajavy takoha kštałtu».
30 maja načalnik departamienta hramadzianstva i mihracyi MUS Biełarusi Alaksiej Biahun vykazaŭ nadzieju, što da kanca hoda budzie padpisanaje pahadnieńnie ź ES ab spraščeńni vizavaha režymu.
«Paśla ŭstupleńnia ŭ siłu pahadnieńnia šenhienskija vizy biełarusy zmohuć atrymlivać na bolš doŭhi termin — u tym liku na 3 i 5 hadoŭ», — kazaŭ Biahun.
Pavodle Makieja, pieramovy ź ES u hetym pytańni praciahvajucca.
«Spatrebicca čas na likvidacyju techničnych pytańniaŭ, jakija ŭ ciapierašni čas prysutničajuć u našym paradku dnia, — skazaŭ ministr. — Ja b nie rabiŭ trahiedyi što da terminaŭ spraščeńnia vizavaha režymu ź ES. My pracujem nad hetym».
Kamientary